12/03/2023 富咸 vs 阿仙奴 - 賽前分析

足球資訊 | 英格蘭超級足球聯賽(2022/23) | 發布日期: 12/03/2023

排名: 富咸(8) vs 阿仙奴(1)

上場聯賽喺97分鐘戲劇性贏波，阿仙奴似乎越嚟越有冠軍相：除咗實力，運氣，仲有最後一刻都唔放棄嘅爭勝心。富咸今季表現平穩，而家喺聯賽榜前半版位置，爭緊歐洲賽一席。佢哋對阿仙奴近年嘅紀錄都認真麻麻，最近9場不勝，4場主場全敗。而阿仙奴就係今季嘅倫敦作客打吡皇，今季作客所有倫敦賽事，4場全勝，更未失過1球，喺英國球會聯賽史上，冇一隊球隊係5場全勝同不失球。遇上戰意超強嘅榜首球隊，富咸呢場想攞分並唔容易。

近幾場阿仙奴冇季初咁順，有人話係球員體力消耗太大，後備兵源不足。聯賽已經進入大直路，後面嘅曼城又窮追不捨，而家多踢一場只得2分差距，真係1分都不能失。成季流流長，冇可能每場都踢好波，劣勢下仲可以搶倒分，對爭標極為重要，阿仙奴最近8場賽事中，有3場係90分鐘或補時入波絕殺對手。上星期對般尼茅夫，開波10秒就先失波，下半場比數更被拉開到0:2，其後由Thomas Partey同White扳平，最後補時階段，後備入替嘅Nelson喺禁區頂射入反勝。熱血反cup一刻，職員都衝落場同球員一齊慶祝，雖然贏得驚險，但亦展示出球員嘅鬥心。星期四嘅歐霸十六強首回合，佢哋作客史砵亭，先由Saliba接應角球頂入，其後被對手扳平，換邊後阿仙奴抵擋唔住對手嘅猛烈攻勢再次失手，對手反超前2:1。呢場阿仙奴亦有啲運，Xhaka嘅傳球省中守田英正彈入網窩，帶住2:2返回主場再戰。

富咸上場聯賽就對同樣爭緊歐洲賽席位嘅賓福特，仍然有Mitrovic，Andreas Pereira，Solomon同Willian攻堅。上半場富咸先落後，其後Andreas Pereira開出罰球中楣，由近況唔錯，連續4場有入波嘅Solomon頂入追和。下半場富咸先失一球十二碼，對手Jensen接應傳中射入成3:1。補時最後1分鐘，後備入替嘅Carlos Vinicius追返一球，最後仍以2:3敗陣。

嚟緊呢場對兩個前阿仙奴球員Willian，Leno特別有意義，Willian 2020由車路士以自由身加盟阿仙奴，25場聯賽只係入咗1球，一個失望嘅球季後，佢返咗巴西效力哥連泰斯。今季重返倫敦加盟富咸，19場賽事已經有3入球3助攻。對森林時拐過對手射入網角，仲成為二月份英超最佳金球。隊友Leno今季以超低轉會費加盟富咸，季初佢曾經向德國傳媒透露，球會政治令佢要離隊，但剛剛就轉咗口風，提到自己同阿仙奴係好嚟好去，希望阿仙奴能夠贏到聯賽冠軍。Leno二月份踢4場，3場不失球，入選二月份英超最佳球員。今季富咸聯賽成績唔錯，足總盃打入八強，門將Leno功不可沒，佢目前嘅最大目標，係以成績去答謝富咸球迷，同希望喺不久將來能重返德國國家隊。

分類:

足球資訊

12/03/2023 富咸 vs 阿仙奴 - 賽前分析

分類:

標籤:

關於我們:

快速連結:

聯絡我們: