06/03/2023 利物浦 vs 曼聯 - 賽前分析

足球資訊 | 英格蘭超級足球聯賽(2022/23) | 發布日期: 05/03/2023

排名: 利物浦(6) vs 曼聯(3)

球隊由盛至衰係一個循環，利物浦同曼聯，一隊成績急速滑落需要重建，另一隊就再踏上上升軌道。雙紅會過去幾季主要係利物浦嘅天下，上季曼聯兩回合共吞咗9隻蛋。時移世易，今季利物浦狀態載浮載沉，開季時作客輸俾曼聯1:2，原來呢場就係今季兩隊嘅寫照。利物浦自2016年1月開始，聯賽未喺主場輸過比曼聯，所有賽事計，近7場只失過1球。今季利物浦聯賽主場氣勢亦特別強，主場同作客嘅得分差距，係聯賽之冠。Ten Hag亦明白，晏飛路嘅球迷會充滿敵意，但佢就正正喜歡呢種氣氛。佢喺歐霸對巴塞、聯賽盃決賽同雙紅會呢幾場重要賽事前，同費爵爺食飯密斟，兩個盃賽都已經順利過渡，現只差呢埸宿敵大戰。

利物浦連續4場聯賽零失球，將要面對季初喺奥脱福入咗致勝一球嘅尖刀Rashford。零封呢個重要任務，就要交俾佢嘅國家隊隊友Alexander-Arnold。兩人最近七次交鋒，Rashford共入咗5球，而世界盃之後嘅10場聯賽，佢只係得1場係冇入球，今季Alexander-Arnold狀態稍遜，所以呢個任務認真艱巨，不過Alexander-Arnold亦有提到，佢哋將會總動員去阻止Rashford入波，因為曼聯會入波嘅人唔止Rashford一個。領隊Klopp就好欣賞Rashford，認為佢有速度，頭腦冷靜，踢法全面，更讚賞佢努力克服自己嘅低迷狀態，希望利物浦球員以佢為榜樣。

曼聯無論係聯賽，本土、歐洲盃賽，表現都極之平穩。上星期先捧走聯賽盃，週中又喺足總盃反勝淘汰韋斯咸，佢哋喺世界盃後嘅聯賽得分冠絕所有球隊，火熱狀態真係一時無兩。自17/18球季開始，對利物浦入球最多嘅係Rashford同Kane，但原來Rashford喺晏飛路仲未開齋，今季球隊順風順水，有機會打破佢嘅晏飛路入球荒。曼聯後防就有少許隱憂，中堅Varane因為腳痛，據報要到星期日早上，先知道係咪能夠上陣。剛剛足總盃對韋斯咸時任正選嘅Maguire同Lindelof，表現都未能比到人信心，要應付對手嘅快馬，會有一定難度。

利物浦希望用呢場大戰反底，加上今個星期熱刺同紐卡素都輸波，呢場會係爭四嘅關鍵一戰。曼聯當然希望再次擊敗宿敵，令球員繼續士氣高昂，能長驅直進到季尾。

分類:

足球資訊

06/03/2023 利物浦 vs 曼聯 - 賽前分析

分類:

標籤:

關於我們:

快速連結:

聯絡我們: