15/04/2023 阿士東維拉 vs 紐卡素 - 賽前分析

足球資訊 | 英格蘭超級足球聯賽(2022/23) | 發布日期: 15/04/2023

排名: 阿士東維拉(6) vs 紐卡素(3)

當大家仲談論緊：阿仙奴曼城嘅爭標機會，利物浦車路士嘅聯賽排名之際，好多人都忽略咗近況唔錯嘅兩隊：阿士東維拉同紐卡素。紐卡素聯賽盃決賽前成績稍為滑落，輸比利物浦同曼城各0:2 後重上軌道，已經五連勝。而維拉就四勝一和，靜靜地升咗上聯賽榜第六位。呢兩隊喺2015/16球季降班嘅球隊，默默向上游到今季一齊爭奪歐洲賽一席。

維拉自Emery去年十一月開始執教之後，球隊表現穩定，並由降班邊緣第十六位升到上而家第六。自佢上任後，聯賽只有阿仙奴嘅得分同勝出率高過維拉。除咗失球少咗，進攻上靠狀態大勇嘅Watkins食糊，亦令球隊成績越嚟越好。Watkins經常用速度壓過對手，而且射門觸覺敏銳，頭頂腳踢都掂。Emery喺冬季轉會窗放走射手Ings，將九號嘅責任交咗俾Watkins，佢亦用入球回報Emery嘅信任，近11埸只得2場冇進帳。上場對諾定咸森林，維拉憑Traore完半場前打開記錄，到補時階段，Watkins笠過Navas射入成2:0。維拉首循環Gerrard帶隊時作客大敗俾紐卡素0:4，而自從兩個月前以2:4輸比阿仙奴之後，維拉未試過對賽聯賽榜前半版嘅球隊，今場對Emery嚟講，會係一大考驗。

紐卡素而家排名第三，同曼聯同分，熱刺多踢一場落後三分，並步步進逼中。佢哋嘅首席射手Almiron雖然早前受傷，但球隊呢五場勝仗仍然入咗13球，8球嚟自Wilson同Isak。雖然近期不失球場次較少，近九場只得一場，但呢兩位射手重拾狀態，令球隊可以繼續贏波。領隊Howe主要踢4-3-3，兩位正前鋒暫時未試過同時正選上陣，但對賓福特下半場兩個球員嘅合作，就令人想起紐卡素全盛時期嘅兩支強矛Shearer Ferdinand組合。不過由於兩位球員都比較容易受傷，預計Howe仍會安排佢哋輪流上陣，佢話希望兩個正前鋒嘅競爭可以帶嚟進步。

維拉嘅Bailey上場聯賽拉傷大腿後肌，Coutinho仍然養傷中。紐卡素嘅翼鋒Saint-Maximin亦係傷咗大腿後肌，但Almiron已經開始操練，呢場有機會復出。

分類:

足球資訊

15/04/2023 阿士東維拉 vs 紐卡素 - 賽前分析

分類:

標籤:

關於我們:

快速連結:

聯絡我們: