29/10/2022 紐卡素 vs 阿士東維拉 - 賽前分析

足球資訊 | 英格蘭超級足球聯賽(2022/23) | 發布日期: 29/10/2022

排名: 英超(4) vs英超(15)

直播資訊: NowE/NOW623

紐卡素今季越戰越勇，12場5勝6和，同阿仙奴曼城一樣，只輸1場，亦係英超近6場戰績最好嘅球隊，而家已經上咗聯賽榜第四。

紐卡素自從沙特主權基金入主後，搖身一變成為英超「富豪球會」之一，雖然未有巨額收購，但就以中價買入多名球員為個別位置補強：技術型中場Guimarães，今季喺聯賽嘅傳球同運球成功率超過八成。前鋒線有今夏轉會窗由皇家蘇斯達轉投嘅Isak，佢雖然正養傷，但首場上陣對利物浦，佢嘅速度同個人特破能力，已經令人留下深刻印象。後防就有英格蘭國腳Trippier同上季喺般尼表現突出嘅門將Pope。後防嘅強化，令到紐卡素暫時係今季英超失球最少，以及擁有最多不失球場次嘅球隊。今季紐卡素前中後三線實力平均，表現咁好，絕對唔係僥倖。

阿士東維拉開季就強差人意，喺Gerrard帶領下，2勝3和6負，只入咗7球，被批評未能好好運用球隊嘅攻擊力。佢帶領嘅最後一場賽事，係沒有最惡劣，只有更惡劣：Mings老烏、Douglas Luiz 領紅、Cash手球輸個十二碼，最後作客敗於升班馬富咸0:3，球迷紛紛叫佢落台，最後佢未上隊巴回程已經被炒。看守領隊Banks，喺還原基本步嘅前提下，球員踢得特別放，對賓福特頭15分鐘已經領先3:0，最後以4:0完場。賽後球會更宣布，前阿仙奴領隊，「歐霸之王」Emery，會喺11月1日接任新領隊。據傳媒報道，去年11月紐卡素曾經想搵佢代替Bruce，但佢希望繼續幫維拉利爾出戰歐聯，最後亦帶領球隊入倒歐聯四強。Emery喺維拉利爾嘅告別記招度話，自己要離開舒適圈，喺阿士東維拉接受一個不一樣嘅挑戰。

維拉上場赢賓福特時著晒火，雙戰頭Ings同Watkins共入3球，中場Bailey 就1入球1助攻。佢哋當然希望，嚟緊呢場可以繼續上一場嘅強勢。紐卡素上場作客熱刺，憑藉今季腳風好順，聯賽12場入6球嘅攻中Almirón同前鋒Wilson嘅入球，作客贏2:1，終止咗熱刺主場嘅11場不敗紀錄。兩隊喺呢個時間交手，必定會有一番惡鬥。