25/05/2023 白禮頓 vs 曼城 - 賽前分析

足球資訊 | 英格蘭超級足球聯賽(2022/23) | 發布日期: 24/05/2023

排名: 白禮頓(6) vs 曼城(1)

週中上演嘅白禮頓對曼城，前者上一場已經確定咗歐洲賽資格，後者就連聯賽冠軍隻盃都捧埋，大家好似冇乜嘢爭咁，但可觀性絕對唔低。白禮頓作為今季嘅神奇球隊，球會122年史上第一次來季將會踢歐洲賽。領隊De Zerbi就同球迷講，佢哋要踢歐霸，唔係歐洲協會聯賽！至於另一邊嘅曼城Guardiola話球員要繼續提升狀態迎接兩個決賽。Guardiola喺賽前記招對De Zerbi讚口不絕，認為白禮頓嘅踢法係獨一無二，佢係近廿年其中一位最具影響力嘅領隊。

八年前，白禮頓曾經差啲降班英甲，Hughton帶領球隊升上英超，其後Potter領軍下，白禮頓上到英超前半版。當季初Potter帶埋教練團離隊之時，冇人會諗到白禮頓今季會有機會創造球會歴史。上場以3:1 擊敗已篤定降班嘅修咸頓，小將Ferguson入咗2球(今季聯賽共入6球)，今季表現搶鏡嘅Mac Allister同三笘薰各交出1個助攻。三笘薰呢招左邊爆落底線擺脫對手，今季已經收死唔少英超右閘。隊友世界盃冠軍阿根廷中場Mac Allister，喺世界盃前先同球會續咗約，到而家佢以10個入球，成為球會首席射手，傳聞幾間豪門都已向佢招手。阿根廷媒體更報道，佢已經同利物浦傾好個人轉會條件。聯賽鬥到尾二一場，維拉緊隨其後爭緊歐洲賽資格，預計白禮頓會全力出擊，誓取歐霸一席，為球季編寫一個完滿結局。

隨着阿仙奴自己放棄埋嗰一線希望，曼城星期日未到，已經可以慶祝三連冠。歐聯對皇馬正選上陣嘅Haaland, De Bruyne同Grealish，對車路士就先列入後備，較少正選機會嘅幾個後生仔Phillips, Lewis, Gomez一落場就搏命爭取表現，副選門將亦有穩健演出，最後小勝1:0。曼城嘅強大板櫈深度係奪冠嘅原因之一，聯賽盃賽去到直路，佢哋就有條件不斷輪換，令幾個主力得到休息之餘，第二梯隊亦能為球隊作出貢獻。反觀阿仙奴嘅主力球員幾乎都冇得休息，季尾疲態盡露，結果不斷失分，將聯賽冠軍拱手相讓比曼城，而曼城季尾就越戰越勇，球員信心爆棚。而家英超冠軍順利攞到手，如果連足總盃同Guardiola恨到發燒嘅歐聯都贏埋，呢隊曼城又會寫入史冊了。