23/10/2022 車路士 vs 曼聯 - 賽前分析

足球資訊 | 英格蘭超級足球聯賽(2022/23) | 發布日期: 23/10/2022

排名: 英超(4) vs 英超(5)

週中曼聯對熱刺，大家賽前預計會係五五波，結果熱刺作客被壓住嚟打。曼聯全場射門28次，係今季聯賽射門次數最多嘅一隊，而Fernandes 就製造咗9個入球機會。除咗復甦嘅Fernandes ，佢哋今季新簽Antony，被認為係大賽殺手：佢對阿仙奴，曼城都有入球。曼聯近六場賽事作客車路士保持不敗，要面對進攻上比熱刺多變嘅車路士，係佢哋後防嘅一大考驗。

Ten Hag提到，對熱刺時用Rashford 係因為呢場需要踢出壓迫性。Ronaldo未有後備上陣，未完場已經走入更衣室，仲離開埋球場。喺星期五記招上，Ten Hag就承認，係Ronaldo自己唔願意後備上陣，而喺對華歷簡奴 (季前熱身賽，Ronaldo又係未完場就走咗) 之後，佢已經向所有球員訓話過，唔接受球員咁做。有前科嘅Ronaldo結果被罰，唔能夠隨隊去車路士，要留喺訓練場自己操練。

車路士自Potter領軍後表現平穩，7場5勝2和。喺Tuchel 帶領嘅頭7場賽事，只係得1場冇失波。Potter 係用人方面，最大嘅改變係重用副選龍Arrizabalaga，得到嘅回報係連續5場賽事，共9小時冇失波。後防方面，Chalobah、Chilwell而家亦有機會輪換上陣。

對曼聯，中場嘅Mount 預計會繼續擔任正選。佢近況唔錯，除咗喺國家隊有波入，返到車路士亦都有入球同助攻。至於鋒線上就比較多爭議，Havert上場對賓福特，踢左80分鐘都冇乜建樹，總係有甩漏同做錯決定。Pulisic換入就立即交倒功課，製造咗幾次有威脅嘅攻勢。數據上亦反映咗今季佢兩個喺場上嘅表現：同樣係2入球/助攻，Pulisic 用咗255分鐘，Havertz 就817分鐘。Potter 話Pulisic 正努力爭取上陣機會，而Pulisic 亦希望操fit自己，以迎戰世界盃。近5場入3球嘅Aubameyang 經過上場小休後，預計會代替出自球會青訓嘅Broja。