04/01/2023 阿仙奴 vs 紐卡素 - 賽前分析

足球資訊 | 英格蘭超級足球聯賽(2022/23) | 發布日期: 03/01/2023

排名: 阿仙奴(1) vs 紐卡素(3)

英超上演重頭戲，今季成績突出嘅紐卡素將會作客阿仙奴。Arteta上任阿仙奴領隊以來，未試過連贏六場聯賽，今次機會嚟啦，不過先要問過今季聯賽防守最強嘅紐卡素。阿仙奴而家以7分領先曼城，呢場贏就有機會進一步擴大優勢。佢哋係英國頂級聯賽史上，第六隊頭16場贏最少14場嘅球隊，之前五隊，最後都贏到聯賽冠軍。而紐卡素亦要乘住強勢力爭上游，贏嘅話就可以暫時壓過曼城升上第二位。

上場紐卡素雖然0:0賽和列斯，但佢哋今季聯賽同盃賽總共踢咗20場，只係輸咗1場。對列斯時佢哋亦製造咗好多攻勢，16次射門但始終唔能夠入波。今季雖然冇重磅收購，仍然成績咁好，領隊Howe認為要成功，球員需要踢「快樂足球」，唔好因為人哋嘅期望而有壓力。球隊而家上下一心，積極改進，如果呢場能夠贏嘅話，就可以證明球員嘅努力係冇白費，令佢哋更有信心爭取好成績。

阿仙奴喺除夕作客白禮頓，上演左一場精彩賽事，憑藉三箭頭Nketiah, Saka, Martinelli同Ødegaard嘅入波，贏白禮頓4:2。Saka 同Martinelli今季延續佢哋上季嘅狀態，隊長Ødegaard喺場上就八面玲瓏，除咗有威脅嘅傳送之外，自己亦有遠射腳頭，佢今季聯賽13場已經入咗7球同埋有5個助攻。作為一個playmaker，佢同三個箭頭喺進攻上緊密連繫，不斷為前線提供足夠嘅彈藥。對白禮頓第四個入球就係由佢策動攻勢，第一時間妙傳比左邊嘅Martinelli，阿仙奴名宿Merson認為英超只有佢同De Bruyne先有呢個閱讀球賽同作出致命傳送嘅能力。Ødegaard年紀小小已經被譽為足球神童，16歲加盟皇馬，輾轉被外借到荷甲嘅希倫芬，維迪斯，西甲嘅皇家蘇斯達，直到上季被外借到阿仙奴，表現對板之下，今季先正式加盟，成就解鎖，成為阿仙奴年輕中前場嘅主力之一。

紐卡素嘅Wilson上場對列斯時後備換入，已經回復狀態，呢場預計會正選上陣，而阿仙奴嘅Emile Smith-Rowe，腹股溝手術後養傷兩個月亦已全面復操，阿仙奴中前場又多個選擇。

分類:

足球資訊

04/01/2023 阿仙奴 vs 紐卡素 - 賽前分析

分類:

標籤:

關於我們:

快速連結:

聯絡我們: