13/11/2022 紐卡素 vs 車路士 - 賽前分析

足球資訊 | 英格蘭超級足球聯賽(2022/23) | 發布日期: 12/11/2022

排名: 英超(3) vs英超(7)

車路士今個星期作客紐卡素，兩隊狀態差天共地。紐卡素最近6場賽事，5勝1和，車路士就2勝，2和2負，贏嗰兩場仲要係歐聯分組賽，近況咁差，領隊Potter備受壓力。

車路士週中聯賽杯0:2輸比曼城，同過去幾場一樣，攻勢欠缺銳利。失去James, Chilwell攻守都受影響。中場方面，雖然仍有Mount負責策動攻勢，Gallagher助攻助守，但始終仍未夾到前面嘅Sterling。呢三位球員，都入選英格蘭世界盃大軍。其中車路士青訓產品，22歲嘅Gallagher被外界認為係爆冷入選。佢上季被外借到水晶宮有8個入波，表現搶眼。代表國家隊上陣4次嘅Gallagher係全能型中場，組織，防守，全場奔跑，亦能壓迫對手。佢嘅入選，相信係因為英格蘭較少呢類出色嘅box-to-box中場球員。

紐卡素就有Pope, Trippier, Wilson入選英格蘭世界盃大軍。Southgate話選球員會睇埋狀態，咁佢吔入選就並唔意外。週中聯賽杯，紐卡素同水晶宮喺法定時間打和，互射十二碼時，紐卡素門將Pope撲出3球十二碼，協助球隊晉級，可算係英格蘭近況最好嘅門將。

紐卡素只係對利物浦時98分鐘失守，輸咗唯一一場。最近7場賽事，有4場係最少入4球。入球功臣，除咗再度入選英格蘭嘅Wilson 外，亦有巴西世界杯國腳Guimarães同巴拉圭嘅Almirón。Wilson今季10場聯賽6入球2助攻，而中場嘅Almirón，聯賽14場入8球，而且已經連續4場，不論主場同作客都有入波。佢剛當選為十月份英超最佳球員同贏得最佳入球。領隊Howe就係十月份英超最佳領隊，球隊氣勢同風頭真係一時無兩。