21/01/2023 利物浦 vs 車路士 - 賽前分析

足球資訊 | 英格蘭超級足球聯賽(2022/23) | 發布日期: 21/01/2023

排名: 利物浦 (9) vs 車路士 (10)

利物浦同車路士真係難兄難弟，兩隊今季都飽受傷兵問題困擾而影響表現。過去幾季對碰總係爭前四，上季聯賽盃同足總盃仲要鬥到決賽，估唔到今季會變咗中游大戰，利物浦排第9位，車路士就踢多一場排第10 。自2015年10月以嚟，未試過兩隊都喺排名前8過外時對賽。

上星期六白禮頓以3:0完勝利利物浦後，Klopp話喺執教生涯中未試過一場係踢得咁差，隊長Henderson更承認球員信心同體能狀態都低迷。幾日後嘅足總杯重賽對狼隊，Klopp一口氣換咗八個球員，幾個後生仔令利物浦終於踢返以往嘅逼搶，防守亦緊密咗，最後Elliot一個靚遠射以1:0贏對手晉級。踢得好又贏波，Klopp話好耐都冇試過咁開心，呢場表現好嘅球員，有機會喺對車路士時擔正。最近有關利物浦賣盤嘅傳言滿天飛，傳聞卡塔爾財團下個月會正式提出收購，亦有傳利物浦老闆只係想搵新投資者入股。轉會窗仲有唔夠半個月就完，仍然未有新資金嘅情況下，冬季轉會窗好大機會只會得Gakpo一個收購。

車路士就相反，新老闆入主短短半年多啲，水喉大開，已經用咗4億英鎊增兵。冬季轉會窗第五個新簽，係花咗8千8百萬鎊羅致嘅阿仙奴頭號目標，薩克達翼鋒Mudryk。上場聯賽半場休息時，Mudryk手持烏克蘭國旗喺史丹福橋亮相。隨後薩克達班主高調宣佈，會將Mudryk轉會費中嘅2千2百萬鎊捐比烏克蘭軍人同家屬。以往車路士嘅資金嚟自俄羅斯嘅Abramovich，而家美國班主Boehly比嘅轉會費，轉頭就去咗烏克蘭戰線，令人懷疑呢個巨額收購係咪有政治成份。呢個deal另一焦點，係合約期長達8年半，據聞係「財政上嘅原因」，需要將開支攤分。

車路士上星期主場對水晶宮，憑Havertz嘅頭槌頂入小勝1:0，終止咗三場聯賽不勝嘅頹勢。Sterling，Pulisic 同Broja仍未傷癒，Potter話新兵Mudryk有機會後備上陣。Mudryk由世界盃開始已經接近兩個月冇踢過正式比賽，需要慢慢建立狀態同適應英超節奏。作為一個速度技術型翼鋒，面對利物浦嘅高位防線，可能會係一個殺著。利物浦方面，缺陣兩場嘅Núñez將會傷癒復出，夥拍Gakpo同Salah，令鋒線增添活力。