31/12/2022 利物浦 vs 李斯特城 - 賽前分析

足球資訊 | 英格蘭超級足球聯賽(2022/23) | 發布日期: 30/12/2022

排名: 利物浦(6) vs 李斯特城(13)

英超再開鑼戰，利物浦同李斯特城成績各異，利物浦作客贏維拉3:1，李斯特城就主場輸比紐卡素0:3。當晚英國傳媒突然報道利物浦同PSV燕豪芬就荷蘭翼鋒Gakpo嘅轉會事宜，已經傾到最後階段，其後PSV更單方面宣布，已經同利物浦就轉會費達成協議。今次迅雷不及掩耳嘅收購行動，雙方由開始傾到官宣，只係用咗五日。由於利物浦鋒線(Diaz, Jota, Firmino)傷兵滿營，而死敵曼聯又對Gakpo虎視眈眈，迫使利物浦重演上季冬季轉會窗搶人一幕，當時由熱刺手中搶走Diaz，今次再度成功截糊。

喺拆禮物日利物浦作客維拉，聯賽杯冇上陣嘅Van Dijk同Alexander-Arnold呢場都踢正選。維拉喺領隊Emery帶領下聯賽贏咗兩場，今場5分鐘已經失手，Robertson接應Alexander-Arnold妙傳交比Salah射入。Núñez多次用速度壓過對手，但攻門都無功而還。Van Dijk射入成2:0後，下半場維拉一開始就積極反撲，Watkins頭槌頂入追近成1:2，利物浦換入幾位球員加強中場嘅控制，最後由十八歲嘅Bajectic埋單贏3:1。由於鋒線傷淨兩個，左邊少有地用咗Oxlade-Chamberlain，新仔Gakpo嚟到後，左翼就會多個選擇。Gakpo上季47次上陣，入咗21球同有15個助攻，亦係上季荷甲最佳球員，今季以9球領先荷甲射手榜，數據上非常突出。佢位置感強，走位靈活，進攻時將會係Robertson嘅好拍擋。Gakpo有6'3"，同利物浦鋒線上其他球員一樣有速度，有腳法。Klopp對呢個新簽感到好滿意，佢話Gakpo喺唔同嘅陣式上，都能勝任左右翼鋒，同正前鋒嘅位置。轉會窗1月1日先重開，佢最快要到對賓福特時先可以上陣。

至於利物浦嘅對手李斯特城，上場對紐卡素開賽3分鐘已經輸咗個十二碼，4分鐘後又比Almirón射入成2:0，及後Joelinton頂入角球，未到半場已經輸緊3球。下半場換入Vardy亦反撲乏力，未能改變戰局，始終失去攻擊主力Maddison，對佢哋嘅影響好大。Maddison膝頭傷患未見好轉，幾日前去咗倫敦尋求專家意見。佢由國家隊返到球會開操時，膝頭另一個位置感到痛楚，Rodgers話暫時未知佢幾時可以踢得返。雖然食咗紐卡素三蛋，但Rodgers 認為作客晏飛路又係另一回事，只要仍然有贏波嘅信念，就有機會令球隊狀態反彈。