英超轉會窗(2)

足球資訊 | 英格蘭超級足球聯賽(2022/23) | 發布日期: 06/08/2022

熱刺
上季季中外借到熱刺嘅 Kulusevski，喺干地帶領下一插即用。Son - Kane - Klusevski 嘅合作，令球隊進攻模式更立體。今季再有Richarlison 從愛華頓加盟，令前鋒線幾位球員，得到輪換機會又不減攻擊力。Richarlison 喺愛華頓嘅四個球季中，有三季嘅入球數字達到雙位數。除咗正前鋒，佢亦能踢左右兩邊，而且頭槌了得，適合高空攻勢。如能配合Perišić 嘅傳中波，將會係對其他球隊嘅一大威脅。

干地擅長利用球場闊度，而曾經同佢喺國米合作過嘅Ivan Perišić，相信能夠滿足佢嘅戰術需要。Perišić 上季喺意甲嘅最後十場賽事中，有三個入球同六個助攻，亦喺意大利杯決賽，加時入兩球，協助祖雲達斯贏4:2。Perišić 上季歐聯雖然只係踢咗六場正選，但喺比賽中就有四十次傳中之多，係去季歐聯之冠。

曼聯
經歷過內外動盪嘅一季，曼聯希望重整旗鼓，新帥坦哈格由賓福特簽下 Christian Eriksen。Eriksen 去年歐洲國家盃時，曾經同死神擦肩過，休息半年後加盟賓福特，雖然只半個球季，但就為球隊注入進攻動力，製造左五個角球入球，而上季曼聯整季就只有四個入球係來自角球。Eriksen亦係球隊提供重要傳送、製造入球機會的重要球員。今季嚟到曼聯，定必加強球隊創造性。

來自阿積士嘅後衞Lisandro Martinez，以風格強悍見稱，外號「阿姆斯特丹屠夫」，可踢中堅、左閘及防中。身型雖然比傳統英超後衛矮小，但佢係上季荷甲爭頂次數超過一百次嘅球員中，成功率最高。而且佢嘅強項係長傳及引球出擊，都能夠幫助到今季曼聯中前場嘅進攻組織。