09/10/2022 阿仙奴 vs 利物浦 - 賽前分析

足球資訊 | 英格蘭超級足球聯賽(2022/23) | 發布日期: 09/10/2022

排名: 英超(2) vs 英超(10)

球賽方向: 阿仙奴讓球[0]

直播資訊: NowE/NOW621

阿仙奴喺各項賽事都越踢越順。歐洲足協杯雖然踢少一場，但仍排分組首名，球員喺場上表現出信心同鬥志。反觀利物浦，季初到而家都踢得患得患失，個別球員嘅狀態，同上季比有天淵之別。

阿仙奴近幾年嚟，對戰強隊嘅成績都比較差，今季唯一敗仗，就係輸比曼聯，所以呢場被認為係Arteta 嘅考牌戰。Arteta 執教下以58.16% 成為阿仙奴史上最高得勝率嘅領隊。佢哋今季攻守平衡，主要靠兩個功臣：一位係Klopp 讚不絕口嘅「本世紀天才球員」翼鋒Martinelli。佢雖然唔係隊中神射手或者助攻王，但喺場上就極具威脅性，當佢控球在腳時，總會向前推進。佢嘅聯賽製造射門機會次數，只係僅次於De Bruyne。另一位係中堅Saliba，今季聯賽踢咗720分鐘都未被對手成功扭過，令人聯想起top fit時嘅Van Dijk。事實上，今季佢嘅多項防守數據（攔截、回搶、解圍）都比Van Dijk 優勝。當提到外界將Saliba 同Van Dijk 作比較時，Arteta話，喺佢眼中 Saliba 係獨一無二。

利物浦自Klopp 上任後，主要係踢4-3-3，今季購入前鋒Nuñez，佢嘅踢法同原來嘅三箭頭有啲唔同，大家估計Klopp係打算改吓陣式。Nuñez 喺熱身賽同社區盾都有波入，球迷寄予厚望，點知佢又唔生性，因為反擊對手嘅挑釁而停賽三場，直接影響咗佢融入球隊嘅計劃。喺球員欠缺狀態，踢法被認為已被對手睇穿，Salah 又未能再一個救全家，加上中場傷病同出現老態，利物浦喺聯賽同歐聯嘅表現都唔穩定。Klopp 喺上場歐聯對格拉斯哥流浪時，試用4-2-3-1陣式，將 Nuñez 放喺箭頭位置，雖然佢未有入球，但佢嘅活力同走位，就為對手帶嚟麻煩，多次射門都比門將撲出。嚟緊對阿仙奴，面對外界批評陣式一成不變，Klopp就覺得，如果發揮得好，對手都冇佢哋辦法。至於會唔會繼續沿用新陣式，佢認為球隊必須轉下陣，去令人感到難以捉摸。

阿仙奴主場紀錄唔錯，聯賽最近七場主場都贏波，但對利物浦嘅往績，就有格食格嘅味道，最近兩季聯賽主場作客都輸波，聯賽杯四強，主場亦輸俾利物浦。可以預計嘅係，呢場嘅入球肯定唔少，兩隊近五場對碰，就總共產生16個入球。