14/08/2022 車路士 vs 熱刺 - 賽前分析

足球資訊 | 英格蘭超級足球聯賽(2022/23) | 發布日期: 14/08/2022

歐洲各地聯賽陸續開鑼，然而轉會市場仍然熱烘烘。最活躍嘅可能係巴塞，但見到有關巴塞嘅新聞，往往會提到車路士。佢哋兩間球會，唔只係呢個轉會窗內激戰連場，亦不斷斟介對方球員：
Christensen - 已投巴塞，因財政問題，仍未能成為註冊球員
Alonso - 傳聞兩間球會已經傾妥條件，待巴塞解決球員註冊問題後，就會簽约
Azpilicueta - 原本希望轉投巴塞，最後決定跟車路士續約
亦有報道話，跟巴塞喺合約問題上仍然糾纏嘅 De Jong，正同車路士傾緊轉會事宜。

車路士今季無左 Lukaku，幾日前又失去Werner。雖然好多人認為後者唔岩車路士style，但佢喺球隊兩季，踢咗89場，有23個入球，21個助攻，係2020/2021 球季嘅球隊神射手，亦係球隊贏得歐聯嘅重要功臣。佢喺歐聯上陣 17 場未輸過，仲有8 入球 4 助攻。Werner回歸萊比錫，Tuchel 需要為鋒線補強，有傳希望邀請同佢合作過嘅前多蒙特，現役巴塞射手Aubameyang加盟。

上場車路士作客愛華頓，只憑 Jorginho 十二碼贏0:1。賽後 Tuchel 認為球隊仍然需要時間，去提升比賽狀態。

同車路士相反，熱剌上場就已經比人感覺入晒局。雖然新兵都未有正選上陣，仍以4:1 大勝修咸頓。Conte 話，佢仍然信任上季為球隊取得歐聯資格嘅球員，新球員固然能增強球隊實力，同時佢哋亦要爭取表現，令球隊喺輪換上有多啲選擇。

熱刺年初開始借用 Kulusevski，佢到埗後分擔咗Kane 同孫興慜嘅工作。Kulusevski 只係踢咗19場，已經有6個入球，9助攻。上場更加狀態大勇，射入一球又有一個助攻，暫時係2022年英超助攻王。今場仲有停賽完畢嘅新兵Richarlison，Conte 係進攻上嘅選擇就更多。

上季熱刺喺聯賽同埋盃賽，四戰對車路士不勝。作為前車路士領隊嘅Conte 曾經提過，希望同熱刺一齊創造一個美好嘅故事。佢明白呢個工作會比喺其他球隊困難，但相信已經踏上正確嘅路。