23/04/2023 紐卡素 vs 熱刺 - 賽前分析

足球資訊 | 英格蘭超級足球聯賽(2022/23) | 發布日期: 23/04/2023

排名: 紐卡素(4) vs 熱刺(5)

紐卡素同熱刺，將會係星期日進行前四爭奪戰。紐卡素而家以三分領先第五位嘅熱刺，踢少1場，贏波嘅話，就會更加鞏固佢哋嘅前四之位。佢哋今季主場只係輸過比利物浦，上星期帶住五連勝嘅氣勢，作客意外地不敵維拉。熱刺亦自己唔爭氣，輸俾般尼茅夫，未能收窄同紐卡素嘅積分差距。熱刺自Conte離任之後，佢嘅副手Stellini暫時接任，球隊未見起色。原本負責搵新領隊嘅足球總監Paratici，因為在任祖雲達斯體育總監時嘅轉會操作問題而官司纏身，被禁止參與足球事務兩年半，上訴失敗，辭任熱刺嘅職務，佢嘅離職亦影響熱刺搵新領隊嘅進程。場內場外都不穩，熱刺嘅爭四之路可謂困難重重。

對手紐卡素就相反，自Howe領軍之後，成績穩步上揚，連勝嘅走勢雖然比維拉中斷，而且近12場只能保持1場不失球，但未有影響佢哋嘅爭四心。Howe話今個星期操練時球員嘅狀態同埋態度一流，會集中精神應付餘下嘅賽事。佢哋上星期中場Longstaff因為扁桃腺問題，只能下半場後備上陣，影響球隊嘅表現。Howe認為Longstaff係中場嘅無名英雄，佢嘅缺陣影響球隊嘅活力同對抗性，球隊需要佢保持控球在腳，同提供重要傳送。嚟緊對熱刺嘅呢場硬仗，上場後備入替嘅Almiron傷癒復出後，有機會正選上陣。佢嘅在陣令球隊踢出高強度同壓迫性，係紐卡素進攻體系嘅重要一環。

雖然仲爭緊前四，熱刺今季嘅成績就唔太穩定，近4場只1勝2和1負，不過佢哋嘅兩邊側擊就非常穩定。熱刺今季常用3-4-2-1陣式，兩翼衞運用球場嘅闊度落底，傳俾中間嘅Kane。數據上，熱刺係今季英超傳中成功次數最多嘅球隊，而今季Kane亦有9個頭槌入球，比Haaland仲多3球。由前3場開始，熱刺除咗左邊Perisic之外，右邊亦多咗Porro。以上場輸俾般尼茅夫2:3計，27個傳中波，兩位球員就各佔11個。紐卡素嘅後防必需小心呢隊聯賽頭槌入波最多嘅熱刺，特別係右閘Trippier經常上前助攻，暴露身後空位，近兩場重拾射門鞋嘅孫興慜亦擅長打反擊。