01/04/2023 曼城 vs 利物浦 - 賽前分析

足球資訊 | 英格蘭超級足球聯賽(2022/23) | 發布日期: 01/04/2023

排名: 曼城 (2) vs 利物浦 (6)

曼城同利物浦近年嘅鬥爭，由2017/18歐聯開始，利物浦雙殺曼城晉級四強，之後嗰季利物浦全季只係輸咗1場，以97分屈居聯賽第二，然後利物浦喺受疫情影響嘅球季贏咗聯賽冠軍，曼城緊隨其後。到上季利物浦又咬住曼城唔放，再次鬥到最後一場僅輸半個馬位未能奪冠。每次對壘，除咗技術較量之外，場外亦有唔少爭議性事件，包括曼城作客隊巴被球迷嘅雜物同煙花擊中，今季聯賽首循環前，曼城投訴Klopp批評佢哋嘅𨍭會操作係仇外。呢場利物浦憑Salah嘅入波以1:0小勝曼城，但更多人談論嘅係Klopp領紅，曼城球迷用希斯堡路慘劇句語塗鴉對手球場，Guardiola話俾球迷嘅銀仔掟親。每次大戰，兩位領隊喺場邊可以嘈到天翻地覆，完場時又會攬頭攬頸。呢兩隊可以話係近年英超嘅瑜亮，如果只計英超對賽成績，Guardiola同Klopp 13次交手，各贏4場，另外5場未能分出勝負。

利物浦今季海鮮味好重，贏曼聯7:0之後，輸俾般尼茅夫0:1。首循環贏曼城1:0，一個星期後又輸俾諾定咸森林0:1，一場贏得漂亮，𨍭頭又輸比弱旅，成績就好似過山車咁上完又落。佢哋係今季嘅主場龍作客蟲：一月至二月初，踢咗4場聯賽，作客3場全部輸晒，以呢個form去曼城，又好難唔比人睇淡。不過今季利物浦遇強越強，不時鋤強扶弱，班球員對強隊時，踢得特別醒神。對傳統強隊試過大勝曼聯，小勝曼城、熱刺同和車路士。呢場利物浦主力冇乜傷病，Núñez因腳踭受傷未有踢國際賽，但已全面復操，有機會披甲。養傷幾個月嘅Luiz Diaz剛復操，預計要下星期先可以上陣。

曼城Hat-trick王Haaland，足總盃對般尼同歐聯對萊比錫之後，今季已經演咗6次帽子戲法。球季仲未完，佢只差3球，就能超越van Nistelrooy同Salah，成為英超球員嚟計，所有賽事入波最多嘅球員。不過佢對住利物浦就似乎唔多順，今季3場只係入咗1球，對手Salah反而喺今季3次對曼城都有入球。呢位hat-trick王因為鼠蹊肌肉受傷，喺國際賽期間去咗巴塞隆拿接受治療，Guardiola話Haaland星期五下午會復操，到時會睇下佢嘅恢復情況，再決定係咪可以上陣。