30/04/2023 曼聯 vs 阿士東維拉 - 賽前分析

足球資訊 | 英格蘭超級足球聯賽(2022/23) | 發布日期: 30/04/2023

排名: 曼聯(4) vs 阿士東維拉(6)

主隊近8場主場成績(左為最新):DWWWDWWW

客隊近8場作客成績(左為最新):DWWDWLWW

對賽往績：曼聯勝(4) - 和(2) - 阿士東維拉勝(2)

曼聯同阿士東維拉都正為歐洲賽資格而戰，曼聯今季聯賽已14場主場不敗，上次輸波已經係聯賽開鑼戰敗於白禮頓。而Rashford更加係主場球王，今季所有賽事入咗19球，只差1球就打破Rooney嘅紀錄。今次維拉以火熱狀態作客奥脱福，主隊要小心為上！事關領隊Emery風頭一時無兩，佢係英超史上，首位上任後連續20場都有入球嘅領隊。Emery執教後，只有阿仙奴同佢哋嘅得勝場數(13)一樣，得分(42)僅比阿仙奴少2分。由接手時球隊接近降班區，到而家有機會爭歐聯一席，球隊進步神速，Emery絕對係今季英超最佳領隊嘅大熱門。

維拉下半季走勢相當凌厲，聯賽已經連續10場不敗，包括8場勝仗同7場不失球，比曼城同期仲攞多一份，堪稱英超近況最佳球隊。首循環主場贏曼聯3:1，終止咗曼聯各大賽事9場不敗嘅紀錄，為Emery再次登陸英超帶嚟一個好開始，可惜四日後聯賽盃作客被曼聯2:4淘汰。事隔半年，維拉已經建立咗自己嘅體系，而喺Emery麾下嘅球員，唔少都得到重生。攻中Buendia認為球隊喺場上充滿信心，感覺一有機會就能製造入球。Buendia嘅創造性，加上冬季轉會窗加盟既左閘Alex Moreno (至今已交出3個助攻)，Watkins喺前面嘅把握力，令到維拉下半季嘅攻力大大增強。Emery就認為爭取歐霸同歐協聯席位嘅機會較大，始終呢場之後，仲要對同樣爭緊歐洲賽資格嘅熱刺，利物浦同白禮頓，將會係場場硬仗。

至於對手曼聯，週四對熱刺上半場雖然控制戰局，先有Sancho入球，再憑一個快速反擊由Rashford射入2:0。但只係踢咗半場好波，下半場球員體力開始下降，換入四位球員，但作用不大，只得三次唔中龍嘅射門，最後被追和2:2。正選嗰班球員，經過漫長球季幾個盃賽，狀態都開始不穩。後備入替嘅Martial，佢跑動比Rashford少，Weghorst外借嚟到亦只係得2個補射入球。剛剛同曼聯續約五年，三月中腳踭受傷嘅年青球員Garnacho，已經全面復操，今季佢以後備身份入替，帶嚟2入球2助攻，將會係曼聯極需要嘅後備力量。Martinez同Varane兩個正選中堅受傷之後，影響咗佢哋嘅防守穩健性，但主場有球迷嘅支持搭夠。曼聯嘅主場，仍然係本季英超唯一一隊不失球場次(9)多過失球(8)嘅球隊。