13/03/2024 紅軍「神刁俠」回歸

足球資訊 | 英格蘭超級足球聯賽(2023/24) | 發布日期: 14/03/2024

利物浦今季剛開始重建，Klopp 2.0向四線進擊之際，高普及團隊突然宣布季尾離任，球迷都擔心球會將來嘅發展。星期二球會宣布前體育總監，愛華士(Michael Edwards)會回巢擔任FSG集團足球CEO一職，係利物浦球迷嘅一大喜訊。愛華士喺利物浦嘅十年其間(2011/22)，由分析部主管變成體育總監。佢能夠低買高賣，條款上經常賺到盡，出手快而準，轉會操作上被利迷稱為「神刁(deal)俠」。

愛華士作為建立高普皇朝嘅重要一員，兩年前毅然離開，傳聞係高普團隊權力太大。有麝自然香，份CV咁靚，等待重建嘅大球會都希望羅致愛華士，佢就先後拒絕左曼聯同車路士嘅邀請。利物浦老闆FSG，如今面對重大改變，需要將球會托付熟人以確保球會順利過渡。大門唔易開，FSG三顧草廬，再加上一個充滿挑戰性嘅高職，最後愛華士先答應回巢。

FSG咁信任愛華士，係因為佢喺球會多年立下汗馬功勞：佢為球會建立球員數據庫，成功以低價引入有潛質嘅球員包括侯城嘅羅拔臣(Andrew Robertson)，利記三叉費明奴(Firmino)文尼(Sadio Mane)沙拿(Mohamed Salah)。高普當年本來希望買入利華古遜嘅布蘭特(Julian Brandt)，最後被愛華士說服簽下沙拿。高普將羅渣士時代嘅費明奴變成世界級偽九，而費明奴本來就係球會早早買入嘅潛力股。FSG一直量入為出，利物浦能以天價賣走古天奴(Philippe Coutinho)從而得到資金引入艾歷臣(Alisson Becker)同雲迪克(Virgil van Dijk)，完成利物浦爭標嘅最後一塊拼圖。

大球會需要有個設備完善，兼且能協助青訓上一隊嘅訓練場地。愛華士曾專程去奧地利球會薩爾斯堡青訓基地取經。利物浦訓練場重建後，將青訓學院同一隊操練場結合，令年輕球員更易接觸一隊，利物浦嘅青訓計劃今年亦開花結果。

愛華士嘅第一個任務，係要搵體育總監，而外界盛傳以前佢喺般尼茅夫共事嘅技術總監李察曉士(Richard Hughes)即將加盟紅軍，而李察曉士亦因為領隊伊拉奧拿跟沙比阿朗素同一經理人而同沙比關係唔錯。如果真係成事，喺尋找高普繼任人時，可能會更易入手。