22/01/2024 般尼茅夫 vs 利物浦

足球資訊 | 英格蘭超級足球聯賽(2023/24) | 發布日期: 21/01/2024

排名: 般尼茅夫(12) vs 利物浦(1)

上季季初，利物浦曾經以9:0主場大勝般尼茅夫，追平英超史上最大勝局。今季嘅般尼茅夫開季成績仍然差勁，9場不勝跌到落降班區之後，強烈反彈至聯賽榜中游位置且越戰越勇。雖然上場作客熱刺輸1:3，但之前聯賽7場6勝1和，包括主場贏紐卡素，和維拉，同作客贏曼聯，個勢好到不得了。榜首嘅利物浦亦都唔弱，已經13場不敗，現領先曼城2分。

利物浦自上場聯賽4:2贏紐卡素之後，兩場盃賽已經冇咗沙拿(Mohamed Salah)，高普嘅主觀願望，當然係埃及盡早出局，沙拿快啲回歸。世事往往不似預期，沙拿喺對加納時拉傷大腿被換出。沙拿以往出勤率極高，甚少傷病，更少因傷離場，所以高普好緊張。經過檢查，國家隊指沙拿只會缺席餘下一場分組賽，以及十六強(一月底，如果埃及能夠晉級)，球迷總算鬆一口氣。另一方面，利物浦傷兵情況越見嚴重，幸好隔住個歇冬期，阿諾(Trent Alexander-Arnold)，蘇保斯拿爾(Dominik Szoboszlai)，羅拔臣(Andrew Robertson)預計喺呢場之後有機會傷癒復出。沙拿未歸隊前，利物浦嘅鋒線就靠各有所長嘅進攻四子撐住。

利物浦球員將會面對近期狀態火熱嘅前隊友，般尼茅夫前鋒蘇蘭基(Dominic Solanke)。蘇蘭基近期表現出色，當選十二月份英超最佳球員，亦係般尼茅夫球會史上首位球員得到呢個獎項。佢單係十二月份已經有6球進帳，令到佢喺英超射手榜僅僅以2球之差，排喺夏蘭特(Erling Haaland)同沙拿之後。般尼茅夫喺伊拉奧拿帶領下，主打高強度踢法，佢哋往往係後場攞到波後，快速直接將皮球送到前場，防守方面亦好有紀律。對手利物浦經常開賽時未夠集中，般尼茅夫如能利用對手遲入局嘅弱點，隨時會製造令人意外嘅賽果。