13/11/2023 車路士 vs 曼城

足球資訊 | 英格蘭超級足球聯賽(2023/24) | 發布日期: 11/11/2023

排名: 車路士(10) vs 曼城(1)

上場倫敦打吡風腥血雨，車路士以4:1擊敗熱刺，尼高拉斯積遜(Nicolas Jackson)第一個英超帽子戲法，擊敗九人應戰嘅熱刺。能夠打破熱刺不敗之身，士氣大振迎戰嚟緊幾個星期嘅連場硬仗，先對曼城，再戰紐卡素，白禮頓同曼聯。曼城就周中清風送爽贏咗年青人，賀蘭特(Erling Haaland)輕傷復出梅開二度。

車路士人多打人少下強攻熱刺，加上熱刺嘅超高位防守下，最終打開勝局，但整體表現仍欠理想，戴帽嘅尼高拉斯積遜攻門仍欠銳利。佢哋近四仗聯賽對曼城一律食一蛋，有格食格嘅味道。而近十三場主場賽事，只得八月份對盧頓一場勝仗。

上仗最搶鏡嘅，係今季其中一個表現最特出嘅球員：高爾彭馬(Cole Palmer)。佢出自對手曼城青訓，喺後備席嘅出色表現，吸引專門羅致年輕球員嘅車路士收歸旗下。佢今季三個入球都係十二碼，剛嚟到就成為球隊嘅十二碼劊子手，認真唔簡單。普捷天奴形容，高爾彭馬喺場上嘅跑動，令佢諗起「天使」迪馬利亞(Angel Di Maria)。

曼城上場聯賽對般尼茅夫，今季新加盟嘅翼鋒杜古(Jérémy Doku)最為搶鏡。佢以一入球加助攻大四喜成為英超史上，21歲之齡有份參與五個入球嘅最年輕成員。唔少前鋒球員射術了得，但門前處理仍欠火喉，哥迪奧拿就對杜古讚不絕口，認為佢球商高，傳射決定準繩。杜古極速融入球隊，既有速度亦有創造性，同係左翼嘅加利殊(Jack Grealish)，雖然周中歐聯助攻俾科頓(Phil Foden)入波，亦明白隊內競爭激烈，即使自己喺場上做咗唔少工作，亦需要多啲入波。

曼城作客係有啲隱憂，近六場所有賽事作客只係贏三場，不過對手車路士新鋒線仍在調整中，曼城咁有經驗嘅防線，要守住大門並唔困難。