27/08/2023 白禮頓 vs 韋斯咸

足球資訊 | 英格蘭超級足球聯賽(2023/24) | 發布日期: 26/08/2023

排名: 白禮頓(1) vs 韋斯咸(7)

白禮頓同韋斯咸開季成績都唔錯，兩隊歐霸球隊，照計應該補強去應付嚟緊嘅歐洲戰線，但兩隊夏季轉會窗都賣走主力球員，不約而同出咗個一億先生，白禮頓有卡斯度(Moises Caicedo)，而韋斯咸亦放走廸勤懐斯(Declan Rice)。英超球隊嘅防中實在太渴市，大球會用高價搶人，最後兩單deal以市價過億成交。係咪物有所值就未知，但兩個賣家可謂賺到笑。

白禮頓最值得欣賞嘅地方，係近幾季不斷出售重心球員，實力都冇受影響，今季主場先炒盧頓4:1，作客亦以同一比數贏狼隊，同曼城阿仙奴一樣兩戰全勝，暫居榜首。當大家仲討論緊，邊個會係英超下個一億先生之時，三笘薰絕對係熱門之選，佢承接着上季嘅勇態，對狼隊一戰一個扭四個入波，呢個入球絕對有條件成為英超八月金球，而隊友馬治(Solly March)亦兩場入3球。球隊喺轉會市場上眼光獨到，經常低買高賣。當年樸特為球隊建立基礎，接任嘅廸沙比，主攻踢法經常水銀瀉地，球員都有出色表現，難怪身價都水漲船高。

韋斯咸就剛剛喺星期日贏車路士，開賽冇耐先由新加盟嘅死球專家獲特包斯(James Ward-Prowse)開角球，艾格特(Nayef Aguerd)頂入，車路士追平之後射失十二碼，換邊後獲特包斯傳比安東尼奧(Michail Antonio)遠柱射入。補時階段再由柏基達(Lucas Paquetá)射入十二碼，最後贏3:1。曼城由於迪布尼(Kevin De Bruyne)要長抖，早前希望引入柏基達，但突然傳出柏基達涉嫌喺巴西參與賭波活動，英國足總正展開調查，佢官非纏身之下，曼城放棄收購。對韋斯咸嚟講無疑係好事，上季融入球隊之後，柏基達就成為韋斯咸捧走歐協聯嘅功臣。佢能夠為隊友鋪橋搭路製造機會，今季中場仲拍住獲特包斯，韋斯咸嘅實力絕對不容忽視。