13/08/2023 車路士 vs 利物浦

足球資訊 | 英格蘭超級足球聯賽(2023/24) | 發布日期: 13/08/2023

英超夏季轉會窗，繼早前曼阿搶飯 (Declan Rice) 之後，聯賽開鑼在即，又上演車利爭奪戰。呢個月一直傳聞車路士斟介白禮頓嘅卡斯度（Moises Caicedo），而利物浦就同修咸頓傾緊拉菲亞 (Roméo Lavia) ，雖然價錢未傾掂，兩球員已表示願意加盟。本來兩單deal各有各做，星期四兩隊突然打突擊，搶奪對方嘅目標：車路士向修咸頓出價，其後利物浦亦向白禮頓出價。到深夜，利物浦以破英超紀錄嘅1.1億英鎊，同白禮頓達成交易。但翌日中午，卡斯度表示只會去車路士，未有如期進行體測，車路士亦願意付更高轉會費。天價截劫不成，仲可能被截糊，晚上有報導指車路士願意付出修咸頓要求嘅5千萬鎊收購拉菲亞，想同時引入兩個防中，執筆時仲未知道兩個球員嘅最後去向。場波未踢已經短兵相接，充滿火藥味。

車路士上季有人滿之患，連更衣室都唔夠用。球季完咗，一個月內幾個正選球員轉會去咗沙特。一度被人懷疑係借沙特財團勢力盡快洗走啲球員，以符合歐洲足協嘅財政公平競賽原則。雖然冇證據顯示有利益輸送，但毫無疑問，車路士掀起咗今夏球壇嘅一輪沙特轉會潮。

瘦身之後，留低嘅只有新領隊普捷天奴需要嘅球員。普捷天奴喺熱刺時，大打進攻足球，嚟到頭兩場熱身賽已經有9個入球，當中由萊比錫加盟嘅尼干古（Christopher Nkunku) 有3球進帳，而來自維拉利爾嘅尼高拉積遜（Nicolas Jackson) 2入球3助攻亦表現出衆，估計今季唔會再出現上季嘅入球荒。可惜季前賽最fit嘅尼干古，喺最後一場熱身賽對多蒙特時膝部受傷，手術後預計要養傷一段時間。但車路士經過黯淡嘅一季後，五場熱身賽不敗，絕對提升咗球隊嘅士氣。

利物浦季前亦係踢咗五場，每場都入3-4球，以佢哋鋒線牌面，加上兩個具創造力嘅新中場，賽果完全唔令人意外。上季經常門前失機嘅紐尼斯 (Darwin Núñez)著起9號球衣，季前同迪奧高祖達 (Diogo Jota) 各入4球。沙拿(Mohamed Salah) 就係季前助攻王，雖然只係入咗3球，但就有7個助攻。利物浦嘅鋒線幾把尖刀張張利，但防守嘅弱點，就因為走咗幾個中場球員而放大。喺欠缺防中嘅情況之下，利物浦喺高位防守時又再中門大開，五場共失12球，面對快翼梅迪歷 (Mykhailo Mudryk)，呢場要零封車路士並唔容易。