01/02/2024 利物浦 vs 車路士

足球資訊 | 英格蘭超級足球聯賽(2023/24) | 發布日期: 31/01/2024

排名: 利物浦(1) vs 車路士(10)

呢幾日球壇最熱門嘅話題，係利物浦領隊高普季尾離隊。車路士領隊普捷天奴，對高普離開英超球壇亦感到可惜，佢回憶起當日被熱剌炒魷，收到嘅第一個message就係來自高普，但佢就講明唔會放軟手腳去送別高普。事實上，呢場係一個月後嘅聯賽盃決賽前哨戰。利物浦球員為球隊，領隊而努力，勢不可擋，車路士近況又唔錯。兩隊近七次喺所有賽事對碰都賽和，創下英國足球史上連和最多紀錄。

星期日足總盃對諾域治，利物浦球員以表現證明並未受領隊離隊嘅消息影響。雲迪克(Virgil van Dijk)同羅拔臣(Andy Robertson)話球隊有未完成嘅任務，會繼續努力，比領隊一個佢完美結局。呢場或許解釋到點解高普喺呢個時候決定離開。利物浦幾個青訓產品，唔止冇怯場，踢落仲有大將之風，特別係頂替阿諾(Trent Alexander-Arnold)嘅右閘巴特利(Conor Bradley)，近三場有3個助攻，攻守都唔輸蝕比師兄。今仗阿諾有機會復出任正選，小師弟嘅成熟表現，就令戰術上更有靈活性，阿諾隨時可以推前一格。

進攻上利物浦板斧唔少，沙拿(Mohamed Salah)嘅埃及雖然喺非洲盃出局，佢仍然養傷中，利物浦鋒線仲有把握力極強嘅迪奧高祖達(Diogo Jota)，佢今季已經有12球進帳，頭同左右腳樣樣皆精，埋門比紐尼斯(Darwin Núñez)更直接同具殺傷力，近幾場亦充分表現射手本色。

至於車路士亦有踢到着晒火嘅高爾彭馬(Cole Palmer)，今季所有賽事共入13球，7助攻，呢個入球數字，已經可以做上季隊中神射手。佢亦係製造最多入球機會同致命傳送嘅球員，絕對係車路士，甚至係英超今季最佳收購之一。聯賽盃四強大勝米杜士堡5:0，佢亦都梅開二度。車路士冇上季咁啞火，但仍然喺聯賽榜中游位置，好大原因係佢哋狀態飄忽，近期聯賽贏富咸，勞頓，水晶宮，錫菲聯，但又輸比狼隊，愛華頓同曼聯，好難預計今場車路士會以咩狀態迎戰，兼且佢哋作客成績麻麻，近四場作客輸咗三場。賽前車路士就傳黎好消息，尼干古(Christopher Nkunku)已經開始操練，將有機會復出。