10/03/2024 利物浦 vs 曼城

足球資訊 | 英格蘭超級足球聯賽(2023/24) | 發布日期: 10/03/2024

排名: 利物浦(1) vs 曼城(2)

哥迪奧拿回應高普離任嘅消息：「成功係取決於對手，對手唔強，你亦唔會有豐功偉績」有競爭先有進步，多年來兩位名帥不斷將對方嘅實力推向高峰，唔只令英超更精彩，亦為兩隊帶來一個又一個嘅榮譽。以奬盃計你有嘅我都有，兩人喺執教生涯中對賽29次，高普贏咗12次，哥帥11，場上鬥到難分難解。高普認為哥迪奧拿係一個傑出領隊，哥迪奧拿亦覺得可以從高普度學倒嘢。呢種亦敵亦友，惺惺相惜嘅關係，喺頂級領隊中並不常見。可惜嚟緊呢場將會係兩位喺英超嘅最後對決，亦代表著一個英超時代即將終結。

賽前利物浦只係領先曼城1分，呢場6分波賽前充滿張力。阿諾(Trent Alexander-Arnold)喺訪問度提到兩隊嘅財政狀況，建立球隊嘅方式都唔一樣，利物浦贏嘅錦標對球迷嚟講更具意義，呢句被傳媒煲到佢有言外之意。夏蘭特(Erling Haaland)隔空反擊：「佢想點講都得，我嚟到第一年已經贏三冠，感覺唔錯，佢應該唔會明白呢種感覺。」

曼城上星期喺曼市打吡，先落後一球嘅情況下，以3:1反勝曼聯。其中最搶鏡嘅係狀態大熱梅開二度嘅科頓(Phil Foden)。賽前高普亦盛讚科頓係現時最佳嘅英格蘭球員。今季所有賽事入球(18)加助攻(10)科頓同沙拿(Mohamed Salah)各有28球，英超球員嚟講並列第三。無論係為隊友製造機會，甚至係自己埋門，都已經能獨當一面。周中歐聯對哥本哈根，佢同迪布尼(Kevin De Bruyne)都輪休未上陣，預計嚟緊大戰會全力出擊，而杜古(Jeremy Doku)帶傷，上陣成疑。

利物浦近期嘅殘陣漸見起色，達雲紐尼斯(Darwin Núñez)同沙拿相繼復出。利物浦上星期六作客諾定咸森林，達雲紐尼斯後備換入連番施射，到補上補嘅99分鐘，頂入絕殺一球贏1:0。昔日嘅門柱男不斷送個波入網，近十場已經有8入球3助攻，仲下下入靚波：對賓福特單刀挑過龍門，周中歐霸對布拉格斯巴達禁區外勁射都見功架。雖然仍然會錯失機會，但無論正選或後備，佢喺前面都極具侵略性。佢同沙拿今季經常合作炮製入球，而家沙拿復出，利物浦攻力有望增強。

分類:

足球資訊

10/03/2024 利物浦 vs 曼城

分類:

標籤:

關於我們:

快速連結:

聯絡我們: