28/04/2024 熱刺 vs 阿仙奴

足球資訊 | 英格蘭超級足球聯賽(2023/24) | 發布日期: 27/04/2024

排名: 英超(5) vs 英超(1)

周中利市打吡，三頭馬車其中一頭喺市內脫韁，3分全失亦幾乎被同市死敵粉碎聯賽冠軍嘅美夢。另一頭馬車阿仙奴，星期日亦有一場關鍵性嘅北倫敦打吡戰，前車可鑑，阿仙奴要保住爭標機會，贏波亦可以重挫宿敵嘅爭四之路。熱刺比聯賽第四嘅維拉踢少2場少6分，要爭來季歐聯一席就沒有退路。

熱刺狀態飄忽，主場近況不滯，近4場主場只係贏得1場但攻力唔錯，連續25場主場都有入球。防守就頗脆弱，已經12場主場賽事未能保住清白之身，今季主場不失球場次僅次於降班膽般尼同錫菲聯。上場聯賽作客仲慘吞紐卡素四蛋。首循環孫興慜兩度扳平，最後賽和2:2。上星期熱刺聯賽輪空，有十五日時間休息，亦令傷兵柏羅(Pedro Porro)同李察利臣(Richarlison)有足夠時間養傷，佢哋嘅復出，尤其柏羅右路嘅活躍度令熱刺攻力增強。

阿仙奴今季防守堪稱聯賽最強，近半(16)場次不失球，作客更係銅牆鐵壁，近6場冇失波。沙利巴(William Saliba)上季尾段爭標期間受傷，間接令阿仙奴斷送聯賽錦標，今季佢同加比爾(Gabriel Magalhães)成為聯賽最強嘅中堅組合。中前場嘅入球能力亦係聯賽之冠，其中近況火熱嘅有偽九號夏維斯(Kai Havertz)。由最初俾人話係水貨，到而家聯賽已經有11個入球，比對上三季喺車路士單季入球都要多。狀態大勇，搶咗馬天尼利(Gabriel Martinelli)正選位置嘅托沙(Leandro Trossard)，更加係近4場聯賽入咗3球。

阿仙奴雖然歐聯出局，聯賽亦輸比維拉，體能同鬥志都未受影響。經歷上季臨尾脫腳之後，今季球員更加成熟，亦表現出爭冠嘅心理質素。呢場面對防線不穩嘅熱刺，進攻上高效又立體嘅阿仙奴，如果能夠踢返大勝車路士嘅水準，熱刺亦難以招架。