07/11/2023 熱刺 vs 車路士

足球資訊 | 英格蘭超級足球聯賽(2023/24) | 發布日期: 06/11/2023

排名: 熱刺(2) vs 車路士(13)

熱刺硬撼車路士，焦點唔再係實力比拼，事關兩隊今季嘅表現，已經反映咗喺聯賽榜上。曾經喺熱刺執教五年，帶領佢哋殺入歐聯決賽嘅普捷天奴，將會返回母會倒戈作賽。普帥對呢個球場充滿美好嘅回憶，坦言好期待重遊舊地。正如佢所講，職業足球領隊都係人，亦有感性嘅一面，但佢喺賽前流露對母會嘅熱愛，並未被部份車迷接受。始終車路士今季表現載浮蛓沉，冇成績支持，普帥仍未得到車迷嘅肯定。

熱刺喺炒咗普帥之後，由摩連奴，干地，紐奴接任都未見起色。直到樸斯迪哥高奧上任，冇咗哈利簡尼(Harry Kane)，表現仲脫胎換骨，現以英超唯一不敗之身高據榜首，成為英超有紀錄以來，頭十場成績最好嘅新領隊。

今季孫興慜嘅拍檔換咗占士麥迪臣(James Maddison)，迅即成為英超最火熱嘅攻擊組合，中場亦有今季「復活」嘅比素馬(Yves Bissouma)，後防新兵年輕中堅雲迪芬(Micky van de Ven) 又表現對辦。今季熱刺嘅優勢，係季初冇太大傷患困擾，聯賽10場，其中有6個正選係踢足10場，令到佢哋場上夾得熟練之餘，亦可以保持狀態同節奏。

相反車路士飽受傷患困擾，右閘域斯占士(Reece James)周中復出，仍未恢復狀態。新兵尼干古(Christopher Nkunku) ，拉維亞(Roméo Lavia) 要長抖，未喺聯賽亮相。尼干古季前表現亮麗，佢嘅受傷令車路士開季就啞火。今季熱刺總入球，比車路士多9球(22 vs 13)，但車路士嘅預計入球率係比熱刺高(17.78 vs 18.54)。車路士門前把握力差，今場梅迪歷(Mykhailo Mudryk)傷癒有機會再被甲，希望能改善攻力。

普捷天奴認為球隊喺細節上尚未掌握好，而且球隊重組不久，球員比較年輕。成績唔理想，數據又好難令球迷接受。以2023年計，佢哋聯賽總共輸咗15場，只有愛華頓(16)同般尼茅夫(18)敗仗比佢哋多。過去39場聯賽亦只贏咗8場，呢八個對手，兩隊已經降咗班，另外六隊都係中下游球隊。今場如果能夠喺榜首球隊度搶到分，有望為球隊上下大大減壓。