維拉除咗裝越位還做咗啲乜?

足球資訊 | 英格蘭超級足球聯賽(2023/24) | 發布日期: 04/01/2024

計球員身價，近年英超big 6是但一隊都可以係維拉嘅兩三倍，但維拉踢出嚟一啲都唔失禮，就算係第1週慘敗1:5俾紐卡素，費格遜都公開話呢隊波其實踢得好正，而往後發展亦都證明咗費sir眼光獨到：維拉錄得開季主場8連勝、贏過晒曼城、阿仙奴、熱刺，其中對衛冕冠軍曼城更係造出全場射門次數22:2嘅瘋狂比數，如果只係人云亦云講維拉裝越位有幾勁，都未足以完全解釋到維拉今年點解會爆發。

正所謂攻守互為影響，要分析艾馬利套打法不妨先從進攻講起：艾馬利維拉嘅進攻套路有一個特點就係中場兩個邊線球員會向中圈方向收窄，同本來兩個中場中形成一個「方陣」樞紐之餘，亦free咗兩條走廊俾兩閘後上，容易令對方兩閘搞唔清合適防守位置而失位。維拉俾兩閘多後上嘅打法同樣會對方防守構成壓力，因此艾馬利個守法會同當今潮流有少少唔同，就係第一度防線會相對靠後、容許對手推多幾腳進入已經收窄咗嘅中場先至做嘢。呢一點可以反映喺衡量逼搶強度嘅PPDA（Passes Per Defensive Action，平均容許對手傳球幾多次先至埋身防守，一般計係越少越好）統計之上：維拉呢項統計喺全英超只係排喺下半版，冇全面分析就會以為維拉防守強度唔夠，實情係艾馬利接受第一道防線靠後好等中、後場兩條線唔會扯到太開，變相將主戰場留喺中場，然後再套用雙重保險：長打4-4-2塞住中路誘導對手將個波分邊減少變數、到最後先至使出熟練嘅越位陷阱，瓦解埋最後嘅失球機會。

終於講到維拉上半季最煞食嘅越位陷阱：以四人防線嚟講，有幾樣教科書有教但又未必個個做得齊嘅地方，艾馬利都執得好緊：當對手有球員明顯要做突破時全部後衛都望住嗰位球員、後衛側定個身準備隨時做前／後移動、重心腳準備好隨時發力、時刻觀察防守線上其他隊友嘅動靜等等，維拉班主力後衛全部都做到晒。維拉裝越位成功次數冠絕英超（維拉對曼聯之前已經錄得86次，恐怖係同時間曼聯、阿仙奴、紐卡素三隊夾埋先至係得74次），背後係好需要靠球員記熟步法配合即時嘅觀察能力，呢啲細節艾馬利係靠賽後同球員睇番replay不斷糾正直至大家都熟習為止。

但講到尾「天下武功，唯快不破」，新年前維拉作客曼聯嗰場波可以當係例子講吓。維拉領先2:0係第一重意外，反輸2:3又係另一種意外：維拉開死球放一個人上越位位干擾對方門將已經唔係第一次*，但曼聯教練坦夏以至門將安拿拿（André Onana）都明顯冇做功課。另一方面，賽前曼聯官宣有新股東進駐，睇嚟係終於識驚嘅坦夏放手一搏嚟個中場大挪移，通過一連串調動全面加快中前場嘅行軍速度，曼聯鍥而不捨猛攻再加上出唔齊full team嘅維拉難以久守，喺多次裝越位勉強過骨後最終都係要俾曼聯反入3球。隨住英超賽程過半，相信各隊對艾馬利呢一系列打法已加深咗認識，對曼聯呢場嘅失利亦都提醒咗艾馬利：下半季一成不變嘅話就難以再獲得同樣嘅成功。

*維拉攻入曼聯1:0嗰球喺開死球之前，庇利（Leon Bailey）企到去曼聯門將安拿拿身後搞到佢進退失據，呢一招其實唔係第一次使出：一個月前歐協聯維拉主場對歷基亞，當時維拉就派咗前鋒麥堅（John McGinn）負責擾敵。呢種玩法如無意外都係出自隊中嘅set piece教練Austin MacPhee之手。艾馬利就曾經試過正賽開死球時自己坐埋一邊、放手俾MacPhee企到最前指揮佈陣，可見艾馬利對呢位兼任蘇格蘭國家隊助教嘅MacPhee幾咁有信心。

分類:

足球資訊

維拉除咗裝越位還做咗啲乜?

分類:

標籤:

關於我們:

快速連結:

聯絡我們: