12/05/2024 曼聯 vs 阿仙奴

足球資訊 | 英格蘭超級足球聯賽(2023/24) | 發布日期: 11/05/2024

排名: 英超(8) vs 英超(1)

上星期曼聯天殘地缺作客水晶宮慘吞四蛋，近7場聯賽，只係贏過篤定降班嘅錫菲聯，賽後坦夏受到排山倒海嘅批評，有球迷忍無可忍，要求坦夏立即執包袱，月底嘅足總盃決賽先有反底機會。對手阿仙奴就毫無疑問係爭冠form，近4場聯賽全勝，今年作客8場只係失咗2分，狀態穩定到主客通殺，絕對係爭冠嘅關鍵。首循環阿仙奴主場3:1贏曼聯，呢場以勢頭嚟講，兩隊差天共地，阿仙奴要爭標不能有失，曼聯聯賽已經比越戰越勇嘅車路士同紐卡素過頭，歐洲賽一席危危乎。

賽前記招，坦夏承認迪勤懷斯(Declan Rice)同曼聯會係絕配。所謂「有買貴冇買錯」，迪勤懷斯係唔少英超球隊夢寐以求嘅中場球員，既可以做防中，亦係全能中場(box-to-box)，參與防守亦協助進攻，今季已經攻入7球，並有10個助攻。由於佢覆蓋面廣全場跑動，隊友施真高（Oleksandr Zinchenko) 就形容佢係一匹馬。自湯馬士柏迪 (Thomas Partey)復出踢六號位，迪勤懷斯就推前，以八號嘅角色夥拍奧迪哥特(Martin Ødegaard)攻堅。對手曼聯由於中場空位較多，迪勤懐斯嘅角色尤其重要，將會主宰攻守。

兩星期前坦夏話曼聯係英超最有活力，兼最具娛樂性嘅球隊。今季曼聯場內場外確實係充滿娛樂性，敵對球迷亦希望永續坦夏。由於曼聯近況低迷，近期謠言滿天飛，有傳拜仁慕尼黑希望坦夏接替杜曹。被記者問到點睇新金主INEOS一直未對來季領隊人選表態，坦夏指佢只集中改善球隊嘅場上表現。傷兵滿營嘅情況下，要填補漏洞，佢嘅任務十分艱巨。上場對水晶宮，卡斯美路(Casimiro)就有災難性嘅演出，整場波被扭過八次，破咗今季英超紀錄，中間嘅卡斯米路同艾歷臣(Christian Eriksen)活力欠奉，中堅老將伊雲斯(Jonny Evans)，面對有速度又靈活嘅水晶宮球員，都變成雪糕筒。嚟緊對阿仙奴，預計般奴費南迪斯(Bruno Fernandes)可以復出做中場輸送，起碼進攻方面會有起色，但防守上，要應付阿仙奴嘅快速反擊談何容易。

分類:

足球資訊

12/05/2024 曼聯 vs 阿仙奴

分類:

標籤:

關於我們:

快速連結:

聯絡我們: