18/02/2024 曼城 vs 車路士

足球資訊 | 英格蘭超級足球聯賽(2023/24) | 發布日期: 17/02/2024

排名: 曼城(2) vs 車路士(10)

曼城自迪布尼(Kevin De Bruyne)回歸後，走勢不斷向上，成隊生猛晒，七戰七勝。迪布尼自復出後，已經貢獻咗2個入球同7個助攻。雖然聯賽踢少一場，落後榜首利物浦2分，球迷同球評家都認為，曼城同以往一樣，有連勝KO對手奪冠嘅能力，仍會視曼城為奪標熱門。今仗嘅對手車路士就繼續係踢「海鮮波」，穩定地不穩定，聯賽敗於利物浦同狼隊後，足總盃大勝維拉，聯賽對水晶宮亦喺補時階段連入2球贏波，連勝兩場後士氣大振。兩隊首循環就上演咗一場緊張刺激嘅4:4入球show，去到次循環，兩隊喺聯賽榜嘅形勢仍然不變，但過去幾個月，兩位曼城青訓產品嘅大爆發，就成為兩隊對碰嘅焦點。

當曼城上半季冇咗迪布尼，科頓(Phil Foden)就喺隊中急速成長，上季佢仲係大後備同輪換之選，呢幾個月佢成功奠定左自己係球會嘅正選位置。近期迪布尼同夏蘭特(Erling Haaland)回歸，呢個鐵三角就喺作客賓福特時合作泡製咗科頓帽子戲法(迪布尼同夏蘭特各貢獻一個助攻)。科頓聯賽今季創造咗15個入球(包括8個入球7助攻)，所有賽事計更達雙位數(15入球10助攻)，係曼城進攻上極具威脅嘅球員。

以億萬班費打造嘅車路士，今季由科頓嘅曼城小師弟，21歲嘅高爾彭馬(Cole Palmer)一腳撐起。首循環佢喺補時階段射入十二碼逼和母會，今次正式回曼城主場倒戈，高爾彭馬話感覺既奇怪又期待。當日為咗爭取上陣機會同證明自己嘅實力，舉家南移倫敦，連自己都估唔到可以咁快融入球隊。上仗對水晶宮補時階段2個助攻，令佢喺聯賽已經累積10個入球同6個助攻。短短幾個月間，由長居後備嘅年輕小伙子變成充滿自信嘅耀眼新星，又一次證明咗：機會係需要自己爭取同把握。