29/10/2023 曼聯 vs 曼城

足球資訊 | 英格蘭超級足球聯賽(2023/24) | 發布日期: 28/10/2023

排名: 曼聯(2) vs 曼城(8)

曼聯歐聯對哥本哈根，本來唔係戲碼，但「劇本」就引人入勝，戲劇性地出現兩位英雄：先由麥佳亞(Harry Maguire)射入致勝一球，完場前又有奧拿拿 (André Onana)嘅十二碼撲救令佢成為救世主，為球隊喺歐聯攞倒重要嘅三分，曼聯近三戰全勝，得以今季最佳嘅狀態迎戰曼城。上季兩隊交手各有勝負，曼聯雖然聯賽曾主場2:1反勝曼城，但就未能阻止曼城以同樣比數擊敗佢哋捧走足總盃。

曼聯近三場贏波，都有麥佳亞在陣，佢近十七場正選贏十六場，勝出率係奇高，但數據就有點水份，對手都唔係傳統強隊，今場對曼城將考驗佢嘅實力。至於今季嚟到曼聯嘅奧拿拿，十三場賽事，失球20，部份失球亦惹人話柄，難免令人懷念「要不是迪基亞」時代嘅曼聯。哥本哈根嘅十二碼雖然對方係射得差，但能夠喺最後關頭拯救球隊，對佢亦會係一支強心針。

對新球員嚟講，曼市打吡可能係全季最重要嘅一場。曼聯嘅海倫(Rasmus Højlund)就好期待呢場波。呢個今季嘅新簽，一降落英超，已經有人將佢同曼城嘅賀蘭特(Erling Haaland)相提並論，海倫就謙虛地大讚對方係一位頂級前鋒，自己將繼續改進。提到曼市打吡，佢最記得嘅係朗尼(Wayne Rooney)嘅倒掛，當年佢只得八歲。

曼城近況唔錯，輸比阿仙奴之後，贏白頓再喺歐聯擊敗年青人，但今季嘅作客成績就唔多理想，三場敗仗(狼隊，阿仙奴，紐卡素)都係作客，防守方面亦冇以往咁穩健，今季十五場賽事只得三次能保持清白之身。近四次對碰，雙曼共入超過20球，預計呢場比賽緊湊之餘，入球亦唔會少。自迪布尼受傷後，夏蘭特喺供應減少下入球少咗，表現比上季失色，歐聯到第三場分組賽，先能夠打破入球荒。反而隊友艾華利斯(Julián Álvarez)今季有7個入球，近五場入3球，炙手可熱，值得大家留意。