07/04/2024 曼聯 vs 利物浦

足球資訊 | 英格蘭超級足球聯賽(2023/24) | 發布日期: 07/04/2024

排名: 曼聯(6) vs 利物浦(1)

強強對碰係高水平嘅技術較量，如曼城對阿仙奴，但娛樂性就可能欠奉。要緊張刺激，可能需要實力相若嘅海軍同水兵。曼聯周中作客車路士，上演左一場睇到球迷熱血沸騰嘅球賽。補時九分鐘，曼聯仍然領先3:2，以為勝券在握，1分鐘後先輸十二碼，再失埋三分，成為英超史上，最遲領先最後輸波嘅球隊。五日內失左五分，坦夏直言不能接受。足總盃八強4:3絕地反勝紅軍，之後兩場聯賽都難逃補時被絕殺嘅厄運。對手利物浦傷兵潮已過，周中顯示頑強鬥志贏錫菲聯3:1，將會再次作客奥脱福誓報一箭之仇。

曼聯作客車路士防守鬆散，再加上唔夠集中，輸波只能怪自己。聯賽榜而家仍然排第六，得失球差-1，沿於穩定性欠佳同不設防。只計2024年，佢哋對手嘅攻門次數達225次，冠絕歐洲五大聯賽。屋樓兼逢夜雨，復出冇幾耐嘅中堅華拉尼(Raphaël Varane)周中又再受傷，連入替佢嘅老將伊雲斯(Jonny Evans)都成為傷兵，暫時未知佢哋會否趕及復出。後防傷患問題嚴重，其他球員又欠缺防守意識，以致經常被放題。近期處於頹勢下嘅曼聯，今季對利物浦時特別醒神，一場和一場反勝，都踢出今季代表作，球員嘅鬥心如何會係勝負關鍵。

利物浦近幾場表現唔算突出，甚少能夠保持清白之身，不過就攻力強勁兼且後勁凌厲，總係能夠用入球去取得勝利。上月作客奥脱福，利物浦下半場錯失幾個致勝機會結果進入加時階段，接連犯錯而被淘汰。隊長雲迪克(Virgil van Dijk)坦言難以接受以咁嘅方式出局，賽後一日佢心情仍未能平復。踏入四月，利物浦嘅傷兵陸續復出，養傷個幾月嘅居迪斯鍾斯(Curtis Jones)周中後備入替，令利物浦嘅逼搶效率有所改善，再加上麥卡里士打(Alexis Mac Allister)近幾場fit到爆，對錫菲聯禁區外遠射直飛網角。近九場已經射入5球又貢獻5個助攻。嚟緊呢場預計防中拍檔遠藤航遠復出，解放麥卡里士打嘅攻擊力，曼聯如再擺鐵筒陣，利物浦就需要靠佢解鎖。

分類:

足球資訊

07/04/2024 曼聯 vs 利物浦

分類:

標籤:

關於我們:

快速連結:

聯絡我們: