25/04/2024 愛華頓 vs 利物浦

足球資訊 | 英格蘭超級足球聯賽(2023/24) | 發布日期: 23/04/2024

排名: 英超(16) vs 英超(2)

馬西塞特郡打吡，兩隊宿敵爭冠、護級去到最後階段冇失分空間。首循環利物浦主場贏2:0，愛華頓過去十二場英超主場對利物浦都未嘗一勝，近四次打吡，愛華頓都未能轟入紅軍大門，面對必須搶分嘅紅軍會係一場硬仗。

以圓滿結局歡送高普只係一個童話故事，近期利物浦就面對殘酷現實：球員狀態下滑，接連喺足總盃同歐霸出局，聯賽主場又遭遇滑鐵盧，0:1敗於水晶宮。星期日作客富咸高普將主力沙拿(Mohamed Salah)，達雲紐尼斯(Darwin Núñez)，麥卡里士打(Alexis Mac Allister)等列作後備，場上終於再展現活力，先有阿諾(Trent Alexander-Arnold)射入招牌式罰球，加芬比(Ryan Gravenberch) 一記遠射同迪奧高祖達(Diogo Jota)嘅入球最後贏3:1。換上傷癒復出同長居後備嘅球員，罰球，遠射同門前把握力終於重現。可惜打吡前傳來壞消息，復出第一場任正選就有入球助攻嘅迪奧高祖達再次受傷，將會缺陣兩週，直接影響紅軍嘅攻擊力。

跟晏飛路只係一個公園之隔嘅愛華頓，今季官非纏身，違反英超利潤及可持續發展規則(Profitability and sustainability rules)一道被扣十分，上訴後改為六分，早前再因另一項控罪被多扣兩分，亦有報道球會欠巨額貸款未能償還，美國私募投資公司777 Partners 嘅收購遲遲未落實。各種問題明顯影響球隊場上表現，上星期對車路士慘吞六蛋。星期日面對同樣被英超扣分嘅護級對手諾定咸森林，雙方都踢得積極。上半場由基耶(Idrissa Gueye)禁區外地波射入1:0，下半場再由麥尼爾(Dwight McNeil)反擊得手，最後以2:0擊敗對手，連續兩場主場贏波兼保持清白之身，大戰前士氣大振。

愛華頓贏波過程未算引人入勝，賽後最多人談論嘅係愛華頓三次禁區內侵犯對手同手球都冇被判罰十二碼。諾定咸森林發出聲明，指VAR球證為護级對手盧頓球迷，實前要求更換球證不果，其後亦兩道發聲明要求英格蘭專業裁判組織(PGMOL)公開比賽當日VAR對話嘅錄音片段。事件震驚英國足總及英超賽會，將會對森林進行違規調查。

分類:

足球資訊

25/04/2024 愛華頓 vs 利物浦

分類:

標籤:

關於我們:

快速連結:

聯絡我們: