27/12/2023 曼聯 vs 阿士東維拉

足球資訊 | 英格蘭超級足球聯賽(2023/24) | 發布日期: 26/12/2023

排名: 曼聯(8) vs 阿士東維拉(3)

曼聯同阿士東維拉，都未能用贏波迎接聖誕節。曼聯作客仍然弱勢，0:2不敵韋斯咸。而維拉就1:1和錫菲聯，錯過咗升上榜首嘅機會。曼聯嘅入球荒仍然持續，由對拜仁開始，已經連續四場零入球。維拉就雖然和局收場，勇戰至於補時階段扳平，鬥志可嘉。

曼聯喺平安夜宣布球會同INEOS集團班主，英國富豪拉傑夫(Sir Jim Ratcliffe)達成協議，收購球會25%股權。集團承諾會提供資金，並接管足球部門，為球隊由內到外進行大改革，為球迷帶嚟一份令人興奮嘅聖誕禮物。

據報道新財團入股後，坦夏暫時仍可以保住帥位，佢仲有時間幫球會從回正軌。佢最先要解決嘅係球隊嘅入球荒。曾被認為可能係英超最強鋒線嘅海倫(Rasmus Højlund)，安東尼(Antony)同加拿曹(Alejandro Garnacho)如今只係冇牙老虎。球季到而家，加拿曹只係傳咗五次波比海倫，而安東尼亦只傳球六次，安東尼同海倫今季聯賽仍然係未開齋。海倫今季上陣10小時45分鐘，只有7個中龍射門。就算華舒福(Marcus Rashford)落場，個個只喜歡單打獨鬥，未能同隊友配合。球季去到一半，坦夏嘅Game plan係點，連球評家都講唔出。

相反對家維拉就不愁入波，今季奧利屈堅斯(Ollie Watkins) 表現出衆，成為維拉不可或缺一員。近幾場維拉後勁凌厲，對熱刺同賓福特都係靠佢喺下半場嘅入球奠定勝局。對般尼茅夫更加係兩度落後下，憑佢嘅助攻同入球追和。艾馬利咁重用佢，除咗係佢喺前線嘅貢獻之外，亦因為佢係一個好全面嘅球員：頂上功夫，控球在腳，帶領隊友向前推進，拉開對手為隊友製造機會。喺維拉嘅高位踢法下，佢快速同充滿活力。面對高強度壓迫，曼聯有可能繼對利物浦後，再一次以血肉長城，穩守突擊嘅踢法應付維拉。