14/04/2024 阿仙奴 vs 阿士東維拉

足球資訊 | 英格蘭超級足球聯賽(2023/24) | 發布日期: 13/04/2024

排名: 阿仙奴(1) vs 阿士東維拉(5)

爭冠之路只剩六場，榜首位置又再換上阿仙奴，以得失球差壓到利物浦登上榜首，亦只同第三位嘅曼城差一分，三頭馬車鬥得激烈。阿迪達要帶領阿仙奴20年後再爭取聯賽冠軍，就完全冇失分空間。球隊要兼顧歐聯戰線，希望至2009年之後再次能夠晉級四強，周中主場賽和拜仁2:2，兩條戰線都任務艱巨。阿仙奴聯賽今個星期會迎戰前領隊艾瑪利嘅維拉，首循環主場贏阿仙奴1:0。同樣係兩條線，聯賽亦爭緊歐聯一席嘅阿士東維拉，攻力唔弱，將會係一場惡鬥。

維拉上星期六賽和賓福特後，同熱刺同分但多踢一場，跌出前四。維拉隊中狀態最好嘅奧利屈堅斯(Ollie Watkins)對曼城時因傷缺陣，上場回歸對賓福特即刻射入2球，周中對里爾又接應角球頂入靚波。今季各項賽事已經累積25個入球同10個助攻。維拉擅長前場壓迫對手，後防就比較脆弱。近七場聯賽，已經有五次係10分鐘內失最少2球，上場對賓福特更係9分鐘內比人連入3球。後防不穩，令佢哋喺歐協聯領先里爾2:0嘅情況下又失波。面對對手嘅快速反擊仍然係維拉嘅弱項。呢場除咗道格拉斯路爾斯(Douglas Luiz)領滿十場黃牌停賽兩場之外，預計可以full team出戰。

阿仙奴今季算係受傷患影響較少嘅球隊，正選陣容上變動不大。主力沙卡(Bukayo Saka)一直帶輕傷未完全復原，正如哥迪奧拿小心處理迪布尼(Kevin De Bruyne)一樣，阿迪達亦識就住嚟用，冇必要就唔會俾佢踢足，因為佢對球隊十分重要：近十一場聯賽已經有9個入球同2個助攻。阿仙奴防守堪稱英超最強，不失球場次達十四場，以五場拋離對手。今季喺控制戰局方面比曼城同利物浦優勝，上場歐聯就罕有地比拜仁嘅壓迫踢法令中後場出亂子。維拉前場壓迫，加上近九場作客倫敦球會都未輸過，艾瑪利會期待今次可以雙殺前球會阿仙奴。