英超這個冬窗真太冷

足球資訊 | 英格蘭超級足球聯賽(2023/24) | 發布日期: 06/02/2024

FIFA錄得2023年全球聯賽嘅轉會洗費新紀錄：89億歐羅，歐洲五大聯賽夾埋比去年冬窗洗多咗八成，唯獨英超係收晒油，比去年剛刷新嘅歷史高位低咗八成。今年冬窗成個英超夾埋都只係花咗1億鎊，與去年同期簽入加普、梅迪歷、最終出現過億鎊交收嘅安素費蘭迪斯相比，實在令球迷難以接受。

英超「斯人獨憔悴」，同佢哋開始「嚴格執行」盈利及永續發展條例（profit and sustainability regulations，PSR）有關。有分析英超嘅人士指出，英超賽會近年開始執正捉人，皆因英國政府施壓再唔搞番好就會成立獨立監管機構。此外12月31日係各隊提交上一賽季賬目嘅最後期限，英超賽會收到資料後還需要兩星期處理、「放榜」，據傳啲球會喺等「放榜」期間極為恐慌，甚至影響埋轉會操作方面嘅慣常運作，而就算等到賽會話OK，冬窗時間都已經冇咗一半，喺咁嘅騎呢處境之下，各隊都驚最終條數計唔掂，寧願忍手唔買人，與及多咗通過租借搵球員應急，當中曼聯就見到十分積極，冬窗期間租出多位球員務求降低人工洗費，但其實除咗曼聯外，紐卡素、車路士、阿士東維拉好幾隊本應都係想增強實力衝擊下季歐洲賽，而結果係佢哋都被迫忍手，就連係人都知爭咁個正中鋒嘅阿仙奴，都只能作壁上觀。

各隊嘅恐懼唔係無中生有：被狠扣10分嘅愛華頓從中游秒跌落降班區、諾定咸森林預計都會喺今季之內受靶、曼城大可以再玩程序拖多季，但口痕友都會識得問：曼城COO貝拉達跳去曼係唔係見部分同PSR有關嘅懲罰避無可避？可見PSR確係起到震懾作用。

喺咁多重陰影之下，今年冬窗最積極嗰隊變叫熱刺：僅用2500萬鎊從意甲熱拿亞引入後衛達古辛（Radu Dragusin），同埋從RB萊比錫租借踢過車路士嘅前鋒添姆雲拿（Timo Werner）番嚟頂替踢亞洲盃嘅「孫仔」（附購買優先權）。不過熱刺都承認：如果添姆雲拿唔係今季喺RB踢到潛晒水，以佢哋嘅出價本應冇可能得手。