從xG角度看近期的曼城

足球資訊 | 英格蘭超級足球聯賽(2023/24) | 發布日期: 22/12/2023

我哋喺10月嗰陣已有一篇文章提及曼城首8場嘅xG得失球差降至近年低位。寫嗰篇文嗰陣曼城排緊第3，近兩個月後，曼城作客輸俾維拉，聯賽排名跌到落第4，呢場第15週嘅比賽之中，曼城同對手嘅射門次數更係出現2:22嘅驚人比數，全場射門2次亦都破晒哥迪奧拿執教以嚟嘅最低紀錄。

近呢兩季哥迪奧拿嘅最大讓步，就係改變了打法俾新加盟嘅前鋒夏蘭特（Erling Haaland）做「真9」，又多咗安排後防踢多一個人，上季成隊波製造機會少咗，但同時被夏蘭特嘅瘋狂入球能力掩蓋咗個問題，嚟到今季當夏蘭特嘅實際入球首次低過xG預期值（場均-0.04，前4季平均值則係+0.16），曼城嘅問題就似乎開始浮現出嚟。

前面火力比預期弱，問題亦會蔓延到去球隊嘅其他位置：門將艾達臣（Ederson）先後對熱刺、車路士犯下大錯失，而用xGA（預期失球）嘅角度去睇，艾達臣亦都比預計值失多咗1.8球，而英超只得6隊會有數值比佢更差嘅守門員。

從數字堆中抽番個身出嚟，球迷可能會更直觀指出曼城今期嘅問題：中場。哥迪奧拿照計係個係幸運兒，佢手上除夏蘭特外，中場嘅迪布尼（Kevin De Bruyne）洛迪（Rodrigo）都係不可多得嘅人材，但當呢兩個中場都同時因傷缺陣，哥迪奧拿又會好遺憾地發現，佢哋兩個真係好難取代，例如哥迪奧拿喺作客維拉時嘗試安排23歲前鋒艾華利斯（Julián Álvarez）墮後，想做番迪布尼嘅鋪橋搭路角色，但踢出嚟都知係火候未夠。洛迪個位就更加唔洗講，洛迪本人集合對抗性、制空能力、甚至創造力於一身，佢坐波監嗰3場聯賽，亦即係曼城僅輸嗰3場，曼城陣容就算幾咁星光熠熠，都好難話有邊個球員可以一換一包辦晒洛迪做開嘅嘢。

上季曼城長時間屈居阿仙奴之下，哥帥去到季中出聲公開批評，球隊即喺下半季迎頭趕上更締造出三冠偉業。嚟到今季「哥氏曼城」嘅xG得失球差收窄到前所未有咁細，固然係反映咗曼城今季衛冕路途異常艱辛，相信亦會吸引到更多人期待哥帥今次到底會出咩板斧扭轉局勢。

（上述有關xG的各項數值以英超第15週為準）

分類:

足球資訊

從xG角度看近期的曼城

分類:

標籤:

關於我們:

快速連結:

聯絡我們: