曼聯新CEO咩來頭?

足球資訊 | 英格蘭超級足球聯賽(2023/24) | 發布日期: 25/01/2024

換新管理層、買地興建新訓練場地……曼聯拉拉扯扯咁多年，直至如今拉傑夫入股，一個個計劃先得以陸續作實。其中較多人留意嘅重要人事變動，除咗有佢手下大將Jean-Claude Blanc入主董事會，更出現一宗「重磅收購」——從同市宿敵曼城挖角，將原任City Football Group COO嘅貝拉達（Omar Berrada）請到嚟曼聯坐正做CEO。

曼迷本來對貝拉達嘅印象，好有可能就係佢曾經喺twitter公開出post「想曼聯輸」，與及試過公開話過曼聯買人俾人搵咗笨。貝拉達未必可以用「十分之體育」嘅角度嚟判斷一個球員好定唔好，但要評估一個球員買得值唔值（而唔係貴定唔貴），佢就睇嚟幾有心得：2014年曼聯用6千萬鎊從皇家馬德里收購「天使」迪馬利亞（Ángel Di María），貝拉達當時就引用獨立研究機構CIES嘅數據，直指迪馬利亞呢個價發咗水足足六成。去到2019年，李斯特城開價8千萬鎊出售麥佳亞（Harry Maguire），貝拉達睇過唔合心水，曼城就真係寧願多等一年，用較平嘅6500萬鎊從賓菲加購入更年輕嘅魯賓戴亞斯（Rúben Dias）……之後係點就唔洗再多提喇。

相信一眾曼聯都好同意，曼聯就算水源充足都唔洗次次做冤大頭：8千萬鎊買安東尼（Antony）、7300萬鎊買辛祖（Jadon Sancho）、3500萬鎊買雲迪碧克（Donny van de Beek）......安東尼都叫做有得落吓場，雲迪碧克就冇咁好彩，辛祖更慘成電競高手。而最氣結係當後兩者分別外借德甲都即刻受重用，辛祖重返多蒙特後更係喺場上用表現說話。呢度話分兩頭：買人番嚟用唔上、用唔到、甚至越用越廢，貝拉達下季履新大可以慢慢捽坦夏（就假設坦夏到時仍然在位），而另一方面曼迷更期待嘅，則該係呢位往績驕人嘅行政專才，能夠清洗瘀血、買得其所，將昔日大衛基爾（David Gill）在位嘅風光日子帶番嚟曼聯。