25/11/2023 曼城 vs 利物浦

足球資訊 | 英格蘭超級足球聯賽(2023/24) | 發布日期: 25/11/2023

排名: 曼城(1) vs 利物浦(2)

國際賽期間，英超嘅焦點落咗係愛華頓身上，佢哋因違反英超財政規定，罪名成立被扣十分。愛華頓被定罪後，外界特別關注違規115條嘅曼城，會唔會有更嚴重嘅懲罰。傳聞近年同曼城競爭激烈，今場嘅對手死敵利物浦，對英國足總施壓，要求佢哋喺今個賽季內對曼城嘅財務違規進行判決。

曼城現以一分領先排第二嘅利物浦，邊隊贏就可以暫時坐上榜首位置。兩隊每次對賽，場內都拳拳到肉，充滿戲劇性同娛樂性。哥迪奧拿同高普都有爭勝嘅DNA，喺場邊特別肉緊，場內場外球迷亦充滿火藥味。主場對利物浦，自2015年起都係曼城嘅天下，今季佢哋聯賽主場亦全勝，反觀利物浦作客成績不濟，仲差過水晶宮同愛華頓。

賽事原本安排喺當地時間5:30pm進行，居民同警方因安全理由反對，結果利物浦就變成今季每個國際期後都踢最早場。班南美兵比其他隊友遲歸隊，長途跋涉亦影響落場表現，導致高普亦多次表達不滿。

曼城喺國際賽期有唔少正選球員受傷，夏蘭特(Erling Haaland)因腳腕受傷，只係踢咗一場，不過星期四已經復操，有望正選上陣。佢今季所有賽事十八場，已經有17個入球。艾達臣(Ederson)對車路士時受傷，早前退選巴西國家隊。大戰前夕就傳來好消息，艾達臣(Ederson)同尼敦艾基(Nathan Aké)已傷癒，隨時候命。

利物浦近五場聯賽不敗，雖然唔係每場都順風順水，但沙拿(Mohamed Salah)嘅穩定性主宰一切。佢喺英超射手榜，已經有10個入球，只落後夏蘭特3球。自加盟利物浦以來，佢對曼城總共攻入11球。對賓福特入完2球後，喺世界盃外圍賽又轟入4球。而紐尼斯(Darwin Núñez)，對阿根廷同玻利維亞亦入咗4球，兩個球員都近況大勇。

曼城今季並無「三冠症候群」，而利物浦就自上季只能以第五完成聯賽之後，整條中場線砍掉重練煥然一新。今季入球較少嘅車路士，都可以喺曼城身上取得4球。利物浦雖然作客，但攻力強勁，可以預計呢場會係入球show。

分類:

足球資訊

25/11/2023 曼城 vs 利物浦

分類:

標籤:

關於我們:

快速連結:

聯絡我們: