03/03/2024 曼城 vs 曼聯

足球資訊 | 英格蘭超級足球聯賽(2023/24) | 發布日期: 02/03/2024

排名: 曼城(2) vs 曼聯(6)

曼城喺足總盃十六強，將盧頓呢個作客球隊嘅地獄球場變成殺戮戰場。單場轟入五球當然唔出奇，但其中四球都係來自同一個隊友就絕對少見。迪布尼(Kevin De Bruyn)同夏蘭特(Erling Haaland)養傷期間，曼城曾接連失分。到爭標重要階段兩個復出，即刻令球隊攻力提升到另一層次。至於呢場打吡大戰嘅對手曼聯，近期狀態火熱嘅海倫(Rasmus Højlund)受傷缺陣，曼聯呢兩場又再啞火。同樣係足總盃，曼聯作客諾定咸森林，臨完場前靠一個角球由卡斯米路(Casemiro)頂入網。曼聯近況唔差，聯賽近五場只係輸過比富咸，但場上嘅表現未能比到人信心，聯賽嘅得失球差暫時打個和(0)，亦反映咗佢哋今季攻不銳守不穩。

哥迪奧拿對呢對攻擊孖寶讚不絕口：夏蘭特需要一個有視野，質素同肯為隊友付出嘅人，而迪布尼就需要肯為佢走位接應嘅隊友。喺哥帥眼中，佢哋兩個係天造地設嘅一對，可以寫出史詩式嘅「足球愛情故事」。夏蘭特話好享受同迪布尼嘅合作，佢哋會喺場上眉來眼去，亦好了解對方：「迪布尼係一個聰明嘅球員，我就係喜歡同聰明嘅球員合作」。自上季開始，迪布尼已經為夏蘭特貢獻咗14個助攻。一個容易受傷的男人，就算狀態唔係100%，後備落場都能製造攻勢，哥迪奧拿就會錫住嚟用，適當嘅時間就會俾佢休息吓。

利物浦名宿加力查喺英國天空電視台節目上，分析曼聯今季戰術上一大漏洞，就係後防同中場經常留有一大片空位，加上球員速度慢，往往令佢哋未能應付對手嘅快速反擊，呢個高位壓迫同時又低位防守嘅踢法，造成場上出現斷層，對賽時聯賽對手嘅攻門次數，僅次於錫菲聯，盧頓同韋斯咸。進攻時曼聯大腳長傳比攻擊鐵三角海倫, 華舒福(Marcus Rashford) 以及加拿曹(Alejandro Garnacho)。當前面失控球權時，球員回防唔切。縱使呢個係曼聯全季嘅寫照，坦夏就認為球隊近況唔錯，士氣高昂，佢哋需要有一個好嘅戰術部署。作客面對強隊，曼聯有可能用返對利物浦嗰一招穩守突擊。