05/04/2024 車路士 vs 曼聯

足球資訊 | 英格蘭超級足球聯賽(2023/24) | 發布日期: 04/04/2024

排名: 車路士(11) vs 曼聯(6)

曼聯同車路士上一輪英超同樣和波，兩位領隊都承認球隊有所不足。作為英超傳統Big 6，今季兩隊真係難兄難弟，表現失色之餘亦穩定地不穩定，賽果好多時都估佢唔倒。曼聯間唔中踢一場好波，車路士就比賽尾段走樣，經常喺領先之下俾人追和，兩位領隊都備受壓力。

普捷天奴話，按傳媒嘅參考數據，車路士理應排喺聯賽榜前四，認為球隊方向正確，只係需要時間同埋經驗。樸達離隊剛好一年，聯賽榜而家同樣係排第十一，同前四嘅距離就由12分變成16分。今季陣容上轉變大，普帥仍未搵到最佳陣式，一眾年輕球員仍面目模糊，缺乏有經驗嘅球員令重建更困難。幸好一堆新簽中跑出一位能肩負重擔，深得領隊同隊友信任嘅高爾彭馬(Cole Palmer)。

主場對護級份子般尼，車路士打多一個反而被扳平1:1，彭馬再建一功領先，臨完場又再被逼和2:2。賽後普捷天奴認為球員欠缺贏波決心，應該以彭馬作為榜樣，又稱讚佢嘅領戰能力，作為新人自願承受當十二碼劊子手嘅壓力，落到場隊友唔知點做就「交個波比彭馬」，未夠一季已經一個人擔起大旗，孭起全隊車路士。彭馬21歲已經成為車路士史上最年輕喺英超有超過20個入球同助攻嘅球員，單係今季各項賽事已經有18入球12助攻。佢嘅攻擊力同創造力，將會主宰車路士呢場嘅命運。

曼聯喺國際賽期前嘅足總盃，絕殺利物浦晉級四強。坦夏認為呢場勝仗大振軍心，會係球季嘅轉捩點。誰知國際賽期後，第一場對賓福特就打回原形。根據Opta數據，賓福特喺曼聯禁區內嘅觸球次數，全場達85次，係英超過去三季以來最多。全場比人㩒住嚟攻，補時入球以為絕殺，轉頭輸返球，最後只能打和1:1。攻守斷層嘅問題依然存在，球員喺場上嘅精神面貌亦難以捉摸，坦夏亦直言對手較有爭勝心。

呢場車路士嘅兩閘古斯度(Malo Gusto)同捷維爾(Ben Chilwell)未必能夠趕及復出，而曼聯就鬧中堅荒：華拉尼(Raphaël Varane)同連達諾夫(Victor Lindelöf)上場傷出，利辛度馬天尼斯(Lisandro Martínez)喺操練時小腿肌肉受傷，後兩者已確定要養傷一個月，華拉尼就已經復操。