高普要走了，球迷：不能沒有你！

足球資訊 | 英格蘭超級足球聯賽(2023/24) | 發布日期: 28/01/2024

高普上任當日喺記招曾經講過：黎到新球會時人哋點睇唔重要，更重要嘅係你走嘅時候人哋點睇你。高普帶領球隊到第九個球季，為利物浦贏盡所有主要錦標，合約本來到2026，星期五突然宣布今季後離開紅軍，消息震撼英國球壇。好多領隊嘅執教生涯中，總會收過幾次違約金，而高普執教廿四年，每次都揀喺佢認為最適當嘅時間退下來。

高普講述自己一直以充沛精神體力執教利物浦，但現在已感到疲倦，欠缺延續落去嘅力量。佢認為球隊今季重建，球員年青又有潛質，已經為未來發展打好基礎，係時候要為自己打算下。佢向球迷承諾一年內唔會再執教任何球會或者國家隊，「就算窮到冇飯開」，亦唔會再執教任何英格蘭球隊。

佢嘅離隊，唔止代表利物浦王朝嘅結束，亦係一個英超時代嘅終結。哥迪奧拿口中嘅「人生最佳對手」要引退，佢笑言：終於可以瞓得好啲。繼費格遜同雲加之後，兩位近年英超球壇舉足輕重嘅瑜亮，惺惺相惜，將對方甚至英超嘅水平不斷推向高峰。

筆者以利迷角度，回顧呢個夢幻之旅：球迷口中嘅「高爸爸」，一上任就要改變球迷嘅諗法「由懷疑變成相信」(From Doubters to Believers)。接任冇耐對西布朗和波，完場時佢帶領所有球員手牽手答謝球迷支持。對水晶宮時見球迷未完場就離開，之後要求球迷留到最後一刻支持球隊等入球。到近期批評主場打氣聲越來越少，「唔打氣嘅球迷請讓出門票」，如今利迷已再次令晏飛路成為作客球隊嘅地獄，球迷亦一條心，撐紅軍，變成球隊第十二人。當然互信並唔係單方面就能建立：四年內最少贏一個冠軍，紅軍變成近年「絕殺王」，甚至上季球隊最低迷時，答應會逆轉球隊嘅弱勢等，都一一兌現。

高普嘅熱血，成功轉化到球員身上。兩季前因主力受傷曾經跌出前四，球員喺季尾團結一致，以超強嘅戰鬥力，後上取得歐聯資格。當然唔少得將「歐戰之夜」嘅熾熱氣氛再次帶進晏飛路：16年歐霸八強4:3反勝多蒙特，19年歐聯四強次回合4:0反cup巴塞晉級。高普嘅積極態度，永不言敗嘅精神，深深咁烙印喺球員度，無論係絕殺或反勝，球員都成為高普口中嘅「心理怪物」(mentality monsters)。

縱使管理層同球員不斷變更，球迷話「至少還有你」，只要高普仍在大家就安心。多年來，唔少球迷情感上，已不知不覺依附著高普。消息公布後，身邊嘅利迷朋友無不感到不捨，有英國球迷喺直播節目中激動落淚，球迷為再次喺現場支持高普嘅紅軍，短短幾小時就掃清今季餘下賽事門票。近期高普確實係失去左早年喺場邊嘅衝勁，活力同笑容，亦蒼老了不少。高普亦話自己仍然係Day 1所講嘅normal one，但已經冇咗normal life。呢份工確實唔易做，壓力大到不能想像。高普花咗近九年時間為球隊貢獻一切，球迷亦係時候尊重高普嘅決定，等佢休息吓，亦唔需要擔心球季餘下幾個月球員嘅表現。隊長雲迪克話球員更有動力，希望球季最後幾個月，能夠成為領隊喺利物浦最圓滿嘅時刻。