16/09/2023 曼聯 vs 白禮頓

足球資訊 | 英格蘭超級足球聯賽(2023/24) | 發布日期: 16/09/2023

排名: 曼聯(11) vs 白禮頓(6)

近期曼聯公關部，炸彈拆完一個又一個：格連活(Mason Greenwood)、辛祖(Jadon Sancho) ，安東尼(Antony)之後，國際賽期完畢，以為球會可以再集中精神應付賽事，又有麥佳亞(Harry Maguire)媽忍唔住外界嘅批評而為個仔發聲。球隊場上亦未有起色，上場阿仙奴補時階段連入兩球反勝，對曼聯士氣唔多唔少會有影響。白禮頓就相反，被認為係球隊良好運作嘅典範，喺𨍭會市場賺到笑，場上表現仍然勇猛。好嘢梗係多人爭，正如球隊主席所講，佢都樂意見到啲職球員咁受歡迎，證明球隊係做倒嘢。

對阿仙奴下半場，曼迷期待咗好耐嘅海倫(Rasmus Hojlund)終於後備上陣，一落場已經展示活力同鬥心，令阿仙奴嘅加比爾(Gabriel Magalhaes)要疲於奔命貼身mark住佢，佢嘅速度，技術，身體對抗性令人眼前一亮。另一位同係入選歐洲金童獎嘅隊友加拿曹(Alejandro Garnacho)，兩人場上嘅合作亦為球迷帶來驚喜。至於仍未有機會落場嘅新防中安拉拔(Sofyan Amrabat)已傷癒，喺國際賽期間留喺球會操練，坦夏提過佢同卡斯美路(Casemiro)可以並存，咁就要睇吓嚟緊陣式上會有咩改變。

白禮頓嘅三笘薰，早前對狼隊嘅入波成為英超八月份最佳金球。上星期日本4:1贏德國一戰中，又係其中一個表現最好嘅球員。近期狀態一樣fit嘅，仲有鋒線尖刀，可能係下個一億先生嘅十八歲小將艾芬費格遜(Evan Ferguson)。上仗對紐卡素時佢大演帽子戲法，成為英超史上，繼奧雲(Michael Owen)，科拿(Robbie Fowler)同巴特威廉斯(Chris Bart-Williams)後，第四位喺18歲或之前完成英超帽子戲法的球員。前英格蘭中鋒舒利亞(Alan Shearer) 認為艾芬費格遜係個全面嘅前鋒，左右腳，頭槌，速度，侵略性同埋入球觸角全部有齊，難怪傳聞雙曼都對佢有興趣。雖然因傷退選愛爾蘭國家隊，佢已經恢復操練，隨時候命。