05/05/2024 利物浦 vs 熱刺

足球資訊 | 英格蘭超級足球聯賽(2023/24) | 發布日期: 04/05/2024

排名: 英超(3) vs 英超(5)

英超聯賽嚟到倒數第3場，利物浦爭冠無望，隨着周中熱刺輸俾車路士，紅軍亦正式取得來季歐聯資格。目睹球隊崩盤，球迷當然希望最後3場可以踢返好波，以第三名衝線。對歐聯一席仲有希望嘅熱刺，去到季尾亦同樣一沉不起，聯賽連輸3場之後，前四之路遭到重挫。近5場聯賽只係贏過森林，對紐卡素同車路士嘅敗仗更加一球不入，呢場如果輸埋就直接將歐聯席位拱手相讓比阿士東維拉。

首循環係一場激戰，利物浦居迪斯鍾斯(Curtis Jones)同迪奧高祖達(Diogo Jota)領紅被逐，以九人守到補時階段，最後馬迪普(Joel Matip)一個老烏協助對手絕殺2:1。呢場一個具爭議性嘅判決，引起極大風波。球證錯判路爾斯迪亞斯(Luiz Diaz)入球越位，賽後英格蘭專業裁判組織(PGMOL)公開VAR錄音片段，球證同VAR溝通上出現錯誤，令球證以為判決正確。PGMOL公開道歉，承認誤判並犯咗嚴重嘅人為錯誤。

當時利物浦嘅狀態，同今日係兩回事。事實上紅軍近5場聯賽亦只係贏過富咸，近8場得1場不失球。對於狀態大幅下滑，有說球員身心俱疲，亦有人認為高普太早宣佈離隊，影響球員作戰心態。高普承認球隊前面忽然啞火，係因為足總盃對曼聯時錯失機會導致出局，影響繼後攻門嘅信心。場上不滯，場外更有沙拿(Mohamed Salah)高普師徒不和嘅傳聞。上場2:2賽和韋斯咸，沙拿後備換入時，跟場邊嘅高普激烈爭執，要達雲紐尼斯(Darwin Núñez)勸交，高普話事情已經解決，但呢場沙拿有冇正選就不得而知，現時佢處於職業生涯低潮期，爆發力、傳射都水準以下。傷兵消息方面，雲迪克(Virgil van Dijk)今個星期缺席操練上陣成疑，但干拿巴特利(Conor Bradley)就已經復操。

同利物浦一樣，熱刺亦都狀態低迷。呢兩場都被對手攻擊死穴，連續2場死球時未有緊mark對手以致失波。同樣嘅錯誤今季已經犯咗16次，僅次於盧頓，錫菲聯同諾定咸森林。後面開窿，前面亦都唔順。占士麥迪臣(James Maddison)季初曾經狀態大勇，受傷之後無以為繼，李察利臣(Richarlison)入球停不了之時又再受傷，前面經常只得孫興慜單打獨鬥。佢近四場對戰利物浦都有入球，今季聯賽入球(16)只係少沙拿一球。樸斯迪哥高奧話以往執教都曾經歷球隊低潮期，對而家熱刺嘅狀況並唔感到意外，認為球隊需要面對困難先可以成長。季尾大家本來都關注熱刺呢個「造王者」，但四日內輸兩場倫敦打吡後，如果未能及時打返起，嚟緊又惡鬥曼城，隨時變成「送分者」。

分類:

足球資訊

05/05/2024 利物浦 vs 熱刺

分類:

標籤:

關於我們:

快速連結:

聯絡我們: