07/07/2024 英格蘭 vs 瑞士

足球資訊 | 2024歐洲國家盃 | 發布日期: 06/07/2024

排名: 世界(5) vs 世界(19)

八強第三場賽事，由驚濤駭浪下晉級嘅英格蘭，對今屆穩打穩扎嘅瑞士。英格蘭有華麗嘅陣容：應屆歐洲金靴獎得主，西甲、英超最佳球員，只係大家期待嘅亮麗攻勢未有出現，俾人批評「攻力疲弱」，對手仲係世界排名二十幾到五十幾。決賽周瑞士越踢越有黑馬feel，同德國鬥到難分難解，贏匈牙利，又完勝上屆冠軍意大利。以往績計瑞士輸晒，史上八強止步，近24次對賽英格蘭，亦只係贏過一場。

唔少球迷都覺得今屆英格蘭踢法沉悶，又冇章法，一關「碌過」又一關。諗真啲晉級並非僥倖，就算隊型風格欠奉，有質素嘅球員亦不少，只需要一個機會，就可以致對手於死地。修夫基係中堅出身，風格較保守係可以理解，正所謂寧願悶悶地咁贏，都唔想好刺激咁輸。賽前英格蘭就傳出變陣嘅消息，會改用上屆歐洲國家盃嘅三中堅陣式(3-4-2-1)，基爾(Marc Guéhi)停賽，將會由干沙(Ezri Konsa)，史東斯(John Stones)同卡爾獲加(Kyle Walker)鎮守後防，科頓(Phil Foden)同比寧咸(Jude Bellingham)雙十號，以抗衡瑞士嘅三中堅踢法。史東斯認為對斯洛伐克補時階段扳平一球，令球隊更團結同上下一心，有信心會踢得更好。比寧咸因為上場向對手後備席做不當手勢，被歐洲足協罰款兼停賽一場，但緩刑一年，嚟緊對瑞士可以繼續上陣。

瑞士上屆歐洲國家盃八強只係互射十二碼輸比西班牙，今屆決賽周亦表現出大賽嘅韌力。防守有紀律，進攻亦有效率，佢哋係決賽周其中一隊被對手攻門次數(9)最少嘅球隊，而八強幾隊之中，瑞士嘅轉化入球成功率只僅次於大熱西班牙，葡萄牙同德國。打法整體，冇個人主義嘅瑞士，決賽周七個入球都由不同球員射入。瑞士鎮守中場嘅隊長沙卡(Granit Xhaka)預計會帶輕傷上陣，面對上季加盟阿仙奴代替佢嘅迪勤懷斯(Declan Rice)。今屆沙卡喺控制中場，比賽節奏方面，絕對係攻守嘅關鍵人物。鋒線上，對意大利時光芒四射，有入球又有助攻嘅左翼華加斯(Rubén Vargas)，喺決賽周有5次射門，13次重要傳送，另外傳球入禁區6次，預計呢場有機會正選上陣。

預計兩隊正選陣容：

［英格蘭］

Pickford - Walker, Stones, Konsa - Trippier, Mainoo, Rice, Saka - Foden, Bellingham - Kane

［瑞士］

Sommer - Schär, Akanji, Rodríguez - Widmer, Xhaka, Freuler, Aebischer - Ndoye, Embolo, Vargas