11/07/2024 荷蘭 vs 英格蘭

足球資訊 | 2024歐洲國家盃 | 發布日期: 09/07/2024

排名: 世界(7) vs 世界(5)

直播資訊: Now 618

荷蘭同英格蘭都係驚濤駭浪下晉級，荷蘭喺先落後嘅情況下，再次出動秘密武器韋賀斯(Wout Weghorst)先追和再反超前，臨完場前頂住土耳其嘅狂攻，驚險萬分。英格蘭就變陣對瑞士，組織流暢度大大改善但仍先失波，及後不斷向瑞士施壓，由沙卡（Bukayo Saka)扳平，加時後互射十二碼贏波晉級。兩隊最近一次對碰，係2019年歐國聯準決賽，荷蘭加時階段贏3:1但近8次交手都鬥倒難分難解，有5次都係90分鐘未分勝負。

英格蘭對瑞士改踢三中堅後攻勢流暢不少，科頓(Phil Foden)移入中路踢返最擅長嘅位置，即刻生猛晒。球迷可能仍未滿意贏縮輸谷，大家應該要理解英格蘭嗰套大賽form，係唔會大開大合同對手搶攻，而且喺最重要嘅時間總係有球員挺身而出，今屆就有比寧咸(Jude Bellingham) 同沙卡。球員心理質素亦佳，比起三年前歐國盃，同一班底已經成熟不少，爭勝心同信心令佢哋企喺十二碼點也無畏無懼。上場梳爾(Luke Shaw)終於能夠後備上陣，修夫基帶埋佢去德國養傷，證明梳爾係佢眼中最理想嘅左閘人選，佢亦話自己已經恢復狀態隨時候命，而因抽筋被換出既哈利簡尼(Harry Kane)已無大礙。

荷蘭嘅賽事頗具娛樂性，總係緊張刺激，經常攻勢不斷可惜唔入肉，門前失機頻頻。對土耳其時先失波後迪比(Memphis Depay)，鄧費斯(Denzel Dumfries)，同沙維西蒙斯(Xavi Simons)，多次起腳都未中龍，最後仍然要靠足以改變戰局嘅中鋒韋賀斯，換邊後入替令荷蘭嘅攻勢更直接。作為傳統中鋒，韋賀斯身型高大，射門觸覺強，頭頂腳踢樣樣皆能，喺禁區內製造混亂。上場後備換入後僅6分鐘，佢接應尼敦艾基(Nathan Aké)傳中，頭槌二傳俾迪比，製造出有威脅嘅攻勢。朗奴高文呢場大可以用韋賀斯配合喺佢身後自由走動嘅迪比，或者沿用迪比同家保(Cody Gakpo)。佢兩個喺前場嘅合作，炮製咗今個決賽周63%嘅入球。

預計兩隊正選陣容：

[荷蘭］

Verbruggen - Dumfries, De Vrij, Van Dijk, Aké - Schouten, Simons, Reijnders - Malen, Depay, Gakpo

[英格蘭］

Pickford - Walker, Stones, Guéhi - Saka, Mainoo, Rice, Shaw - Bellingham, Foden - Kane

分類:

足球資訊

11/07/2024 荷蘭 vs 英格蘭

分類:

標籤:

關於我們:

快速連結:

聯絡我們: