26/06/2024 荷蘭 vs 奧地利

足球資訊 | 2024歐洲國家盃 | 發布日期: 25/06/2024

排名: 世界(7) vs 世界(25)

直播資訊: Now 618

D組形勢隨住進攻啞火嘅法國賽和荷蘭而出現更多變數，喺開波前荷蘭仍以較多入球暫居榜首，考慮到法國面對鐵定出局嘅波蘭好大機會取勝，加上奧地利亦在不斷調節亦步亦趨，荷蘭稍有不慎跌入D組第3名嘅話十六強就有機會即刻硬撼西班牙，相信全隊上下都唔會想踏上呢條路。

奧地利首場僅輸一個烏龍波俾法國，第二場對波蘭信心更大，喺比賽期間嘅一系列調動亦似乎能夠將火力推高一格：右翼放入雲馬（Patrick Wimmer），好等鮑加特拿（Christoph Baumgartner）移入中路，同時將拉馬（Konrad Laimer）順移落防中位，令後兩者都可以踢番自己喺聯賽最熟悉嘅位置。較為可惜係今場爭取到正選落場即取得入球嘅飛燕諾中堅查奧拿（Gernot Trauner）受傷退場，已知今場肯定缺陣，如果有呢位荷甲球員助戰相信會俾到球隊更多實質上嘅幫助。

無獨有偶，同樣踢4-2-3-1嘅荷蘭上場對法國亦喺“3”呢一條線下功夫：費林邦（Jeremie Frimpong）首次喺決賽周正選上陣出任右翼，俾「主場」出戰嘅RB萊比錫攻中沙維西蒙斯（Xavi Simons）移入中路嘗試擔任「10號仔」工作。外界早已有唔少聲音希望俾西蒙斯「坐正」，與此同時亦有人認為呢次調動有可能只係專為迎戰法國而設，好等習慣翼、衛兩邊走嘅費林邦擔當防守迪奧靴南迪斯（Theo Hernández）嘅第一度防線。面對法國，荷蘭呢個新嘅中前場組合未有斬獲，但始終荷蘭開賽前接連失去法蘭基迪莊、高文拿斯已俾人認定個中場係低咗個檔次，而奧地利自從上屆分組賽對碰輸0:2之後亦出現咗翻天覆地嘅變化，荷蘭再唔勇於求變就只怕要坐以待斃。