02/07/2024 法國 vs 比利時

足球資訊 | 2024歐洲國家盃 | 發布日期: 01/07/2024

排名: 世界(2) vs 世界(3)

直播資訊: Now 618

世界排名第2嘅法國同第3嘅比利時，就算入到歐國盃決賽周都仍然似打緊熱身賽，不斷犧牲自己嘅得分quota去搵出真正理想嘅陣容同打法。如今兩隊「求仁得仁」讓出小組首名席位成功爭取跳去上線廝殺，擁躉當然高呼冇眼睇。

前鋒攻力非常差、馬古斯杜林（Marcus Thuram）未夠班、麥巴比（Kylian Mbappé）單天保至尊，呢幾方面都係有目共睹，但其實法國嘅混亂中場先至係問題核心。教練迪甘斯一心催谷剛復出嘅曹亞文尼（Aurélien Tchouaméni），但又唔捨得拉比奧特（Adrien Rabiot）同埋老而彌堅嘅尼高路簡迪（N'Golo Kanté），於是去到對波蘭嗰場“why not all”放晒三個人落場，但後兩者擺位稍為移前要多啲參與進攻根本唔係佢哋踢開嗰瓣，最終都係要靠化身成忍者龜完全體嘅麥巴比射入十二碼追平保住顏面，但就已經唔夠分數保住小組首名。呢場波值得留意係老將基奧特（Olivier Giroud）落場時間進一步增加，究竟迪甘斯係唔係一開始就有打算慳住用呢位已經37歲嘅「銀河唯一」、留待淘汰賽先至發力幫拖，嚟緊對比利時應會見到端倪。

比利時最後一場分組賽悶和烏克蘭，教練泰迪斯高發火怕且都係出自真心。平心而論比利時從第2場贏羅馬利亞起已算係執番靚個正常同合理嘅陣容，前場偏左迪布尼（Kevin De Bruyne）、杜古（Jérémy Doku）呢對曼城組合亦重新運轉，但係盧卡古（Romelu Lukaku）狀態同績效仍然未見起色，此消彼長之下次選前鋒奧賓達（Loïs Openda）嘅出場時間過度被剝削，假如最終都係發現盧卡古擺脫唔到魔咒，教練泰迪斯高到時恐怕手上已經再冇其他籌碼可以一拚。

預計兩隊正選陣容：

【法國】
Maignan - Koundé, Upamecano, Saliba, T. Hernandez - Tchouameni - Kanté, Rabiot - Dembelé, Barcola - Mbappé

【比利時】
Casteels - Castagne, Faes, Vertonghen, Theate - A.Onana, Tielemans - De Bruyne - Lukebakio, Doku - Lukaku