01/07/2024 英格蘭 vs 斯洛伐克

足球資訊 | 2024歐洲國家盃 | 發布日期: 30/06/2024

排名: 世界(4) vs 世界(48)

直播資訊: Now 618

英格蘭fans現場睇波睇到瞓晒覺嘅畫面傳遍全世界，隊長哈利卡尼（Harry Kane）賽後表示「任務完成、三場之中呢場踢得最好」嘅言論更辣㷫唔少支持者。諗深一層，哈利卡尼又係唔係錯晒呢？3場不敗，5分順利榜首出線，更係「唔跟大隊」湧去上線而留喺相對簡單啲嘅下線，呢幾樣都係唔少傳統強隊想做都做唔到嘅結果。

至於講番比賽本身，哈利卡尼所指嘅進步可能就係講緊佢同比寧咸（Jude Bellingham）撞位嘅問題。2022年世界盃時比寧咸只係一個新仔，而且擺位較後，當時未見有問題發生，到依家比寧咸已貴為皇家馬德里當家小生、歐聯冠軍得主，放入攻中嘅佢覆蓋範圍大得嚟又同哈利卡尼冇乜默契同火花，未能催生入球機會。教練修夫基今期繼續受靶仍喺度默默耕耘，對斯洛文尼亞安排比寧咸偏向左路搵食，令左翼科頓（Phil Foden）更加安心攻上去。雖然場波最終只能悶和0:0，但當再考慮埋賽前嘅斯洛文尼亞已係連續8場比賽不敗，英格蘭呢仗未能入波又似乎唔係罪無可恕嘅過錯。科頓早幾日因為做daddy申請暫時離營，現時已經歸隊回復操練。

斯洛伐克上場同對手羅馬尼亞踢到下半場見和波冇壞，都已經放軟手腳未有太多受壓，隊波仍係靠PSG中堅史堅尼亞（Milan Skriniar）同埋拿玻里防中盧保卡（Stanislav Lobotka）撐起條中軸線維持隊波嘅運轉。英格蘭如果喺中場放啱人嘅話將可取得主動。上場派干拿加歷查（Conor Gallagher）踢正選又係棋差一著，而修夫基半場急救換入嘅19歲小將明奈（Kobbie Mainoo）表現合格，今場較有機會獲得正選位置。

預計兩隊正選陣容：

【英格蘭】
Pickford - Walker, Stones, Guehi, Trippier - Mainoo, Rice - Palmer, Bellingham, Foden - Kane

【斯洛伐克】
Dubravka - Pekarik, Vavro, Skriniar, Hancko - Lobotka - Kucka, Duda - Schranz, Haraslin - Bozenik