07/07/2024 荷蘭 vs 土耳其

足球資訊 | 2024歐洲國家盃 | 發布日期: 06/07/2024

排名: 世界(7) vs 世界(42)

直播資訊: Now 618

荷蘭同奧地利一樣，對上一次對土耳其都係大炒6:1（2022年世界盃外圍賽次回合），如今土耳其已經絕地大翻身淘汰奧地利闖入八強，接落嚟就係要覆桌荷蘭。

土耳其喺查漢奴古（Hakan Çalhanoğlu）、亞卡甸（Samet Akaydin）同時停賽讓晒車馬炮嘅劣勢下爆大冷90分鐘了結奧地利，頂替亞卡甸中堅位置嘅美列迪美羅成為超級救世主，佢喺開波1分鐘唔夠已經攻破奧地利大門，除咗可以令球隊安心主守之外，亦都打亂晒奧地利嘅部署。好衰唔衰，美列迪美羅慶祝時展示咗土耳其右翼組織嘅標誌手勢停賽兩場，佢個中堅位將要交番俾亞卡甸。土耳其對奧地利嘅另一重要變陣係安排中鋒巴利斯耶馬斯（Barış Alper Yılmaz）踢回較擅長嘅邊路位置進而要求更多參與防務，對奧地利嘅成功經驗相信會說服到教練蒙迪拿照辦煮碗應對左路有加普（Cody Gakpo）復活嘅荷蘭。

今場將係土耳其首次移師柏林作賽。柏林擁有全德國最大嘅土裔社群，儘管美列迪美羅事件令德、土兩個政府有啲尷尬，但係土耳其總統已經準備好前往柏林入場打氣。對手荷蘭已係第二次踢柏林場，上場剛好就係意外被奧地利擊敗嗰場分組賽，如今避過咗再對奧地利，荷蘭照計係可以放下其中一粒心頭大石。荷蘭喺D組一下子由榜首變第三聽落好肉酸，但正正係D組第三先可以轉打相對平靜嘅下線，亦俾到足夠時間荷蘭修正，上場對羅馬尼亞兩翼都有斬獲，無疑係打番起個信心。

預計兩隊正選陣容：

【荷蘭】
Verbruggen - Dumfries, de Vrij, van Dijk, Aké - Schouten, Reijnders - Malen, Simons, Gakpo - Depay

【土耳其】

Günok – Müldür, Akaydin, Bardakci, Kadioglu – Özcan, Ayhan - Yilmaz, Calhanoglu, Aktürkoğlu - Güler