24/06/2024 瑞士 vs 德國

足球資訊 | 2024歐洲國家盃 | 發布日期: 23/06/2024

排名: 世界(19) vs 世界(16)

分組賽去到最後一場，大家嘅焦點唔多唔少會放喺淘汰賽階段。A嘅首名，十六強會對C組(英格蘭/丹麥/斯洛文尼亞/塞爾維亞)次名，而次名會對B組(西班牙/意大利/阿爾巴尼亞/克羅地亞)次名。已晉級嘅德國，拿高士文就直言希望十六強能避開強隊，但亦唔想打亂球隊節奏，所以呢場唔會做大輪換。第二嘅瑞士領先蘇格蘭3分，得失球差較佳，叫做半隻腳踏咗入十六強，打和就皆大歡喜兩隊攜手出線，兩隊會唔會踢得保守啲，避免受傷同攞牌會係呢場嘅關鍵。事實上，瑞士有唔少球員都踢緊德甲，球員都清楚對手嘅踢法。德國有主場優勢，兩隊近三次對碰，瑞士都保持不敗，兩隊想坐和望贏都要小心。

德國首場大勝蘇格蘭5:1，第二場又憑穆斯亞拿(Jamal Musiala)同根度簡(İlkay Gündoğan)嘅入波，以2:0戰勝「黑馬」匈牙利。穆斯亞拿(Jamal Musiala)同斯洛伐克嘅施漢斯(Ivan Schranz)各以兩個入球暫居歐國盃射手榜首名，佢亦係歐國盃史上，頭兩場都有入波第二最年輕嘅球員。有超強盤扭能力，速度同爆發力嘅穆斯亞拿，拿高士文對佢讚口不絕，認為佢兩場表現都非常出色，除咗有入球，進攻時位置感同控球在腳為對手帶來威脅，進攻之餘亦勤力防守，阻止對手反擊，呢場對瑞士，佢仍然會係中前場嘅關鍵球員。

瑞士國家隊近年青黃不接，外圍賽最後三場和以色列科索沃同輸比羅馬尼亞，次名出線但成績未如理想，曾傳出隊長沙卡(Granit Xhaka)同領隊不和。首場擊敗匈牙利，瑞士以壓迫踢法，中場新星阿爾比舒夏(Michel Aebischer)一助攻一入球，尾段換入上季因傷患問題，只係踢過幾場嘅前鋒安寶路(Breel Embolo)打反擊射入成3:1。第二場面對不斷向瑞士施壓嘅蘇格蘭，一度先失烏龍波落後一球，及後老將沙基利(Xherdan Shaqiri)把握對手回傳犯錯，禁區頂勁射入世界波扳平。沙基利係歐洲唯一一個近六屆大賽(世界盃同歐國盃)都有入球嘅球員，雖然年屆32，體力大不如前，但死球，遠射及致命傳送質素仍然不變。呢場瑞士又再喺受壓時換入安保路，以佢嘅速度同把握力牽制對手，再一次快攻笠入，雖然被判越位，呢個戰術可謂兩場都湊效。

預計兩隊正選陣容：

[瑞士］

Sommer - Schär, Akanji, Rodríguez - Widmer, Xhaka, Freuler, Aebischer - Ndoye, Embolo, Vargas

[德國］

Neuer - Kimmich, Rüdiger, Tah, Mittelstädt - Andrich, Kroos - Musiala, Gündoğan, Wirtz - Havertz

分類:

足球資訊

24/06/2024 瑞士 vs 德國

分類:

標籤:

關於我們:

快速連結:

聯絡我們: