05/02/2024 阿仙奴 vs 利物浦

足球資訊 | 英格蘭超級足球聯賽(2023/24) | 發布日期: 04/02/2024

排名: 阿仙奴(3) vs 利物浦(1)

利物浦今季餘下嘅賽事，比喻為係「高普farewell tour」，先後大勝諾域治同車路士，聯賽榜現領先阿仙奴5分。兩隊喺聖誕前嘅聯賽同新年後足總盃，首場1:1賽和，阿仙奴成為聖誕榜首，之後成績就稍微滑落，足總杯以0:2主場敗於利物浦，再輸比韋斯咸同富咸。連贏兩場之後阿仙奴希望藉住個勢報足總盃嘅一箭之仇。呢場亦係非勝不可，再失分嘅話，爭標之路就更困難。

高普團隊季尾離隊時，將會為利物浦留下重要資產：今季青訓小將表現突出，其中干拿巴特利(Conor Bradley)對車路士一仗表現搶鏡，2個助攻同1個入球協助利物浦贏4:1。佢一月初足總盃對阿仙奴時，尾段換入負責看守馬天尼利(Gabriel Martinelli)，只用咗四場已經變成耀眼新星。英超史上，21歲以下後防球員，單場有3個入球或助攻只得佢同2019年嘅阿諾(Trent Alexander-Arnold)。帶佢哋兩個上一隊嘅高普，呢場對阿仙奴將有個快樂的煩惱：右閘要二揀一。鋒線上，上場「柱楣大四喜」嘅達雲紐尼斯(Darwin Núñez)上仗後腳部腫脹，上陣成疑，但星期五就仍然有跟操。

阿仙奴足總盃主場對利物浦時勢頭唔錯，只係未能把握機會。聯賽接連輸咗兩場之後，大勝水晶宮5:0又贏諾定咸森林2:1。森林一仗阿仙奴大部份時間控制戰局，面對防守緊密嘅森林，要等到下半場先由加比爾捷西斯(Gabriel Jesus)窄角度射破馬菲端拿(Matthew Turner)嘅大細龍。呢位巴西前鋒，係隊中嘅入波福將，有入波嘅賽事球隊就會不敗。佢對利物浦時特別醒神，英超11場有5入球3助攻。阿仙奴名宿伊恩胡禮話阿仙奴欠缺一各前鋒殺手，加比爾捷西斯就希望自己會做倒呢個角色，佢表示近期正嘗試改變踢法，會多啲入禁區同起腳射門，而且會不斷嘗試。佢嘅質素毋用置疑，只係今季受膝傷問題困擾，幸好呢個星期佢有正常操練，預計對利物浦時可以上陣。